گەلەریی ئارام لە سلێمانی؛ مەڵبەندێکی هونەری و رۆشنبیری لە ژێرزەمینی ماڵێکدا
گەلەریی ئارام لە سلێمانی؛ مەڵبەندێکی هونەری و رۆشنبیری لە ژێرزەمینی ماڵێکدا
لە یەکێک لە گەڕەکە کۆنەکانی شاری سلێمانی، دەرگایەکی دارین بە تابلۆیەکی رەنگاوڕەنگەوە سەرنجی رێبواران رادەکێشێت؛ "گەلەریی ئارام" شوێنێک کە لە بنەڕەتدا ژێرزەمینێکی سادەی کۆگاکردنی کەلوپەلی ماڵ بووە، بەڵام ئێستا بووەتە یەکێک لە دیارترین ناوەندە کولتوورییەکانی شارەکە. ئارام عەلی، هونەرمەند و خاوەنی گەلەرییەکە، باس لە سەرەتای کارەکانی دەکات و دەڵێت: "ئەم جێگەیە پێشتر شوێنی شتە زیادەکانی ماڵ بوو. سەرەتا تەنیا حەزم دەکرد ستۆدیۆیەکی گەورەم هەبێت بۆ کارکردن، بەڵام دواتر بیرۆکەکە گۆڕا."
مێژووی ئەم گەلەرییە بۆ ساڵانی 2003 و 2004 دەگەڕێتەوە، کاتێک شار تینووی ناوەندی رۆشنبیریی بوو. ئارام ئاماژە بەوە دەکات کە سەرەتا تەنیا وەک گەلەرییەکی تابلۆ دەستیپێکرد، بەڵام دواتر بووە مەکۆیەکی گشتگیر. ئەو دەڵێت: "باوەڕم وابوو کە ئەم ناوەندە تەنیا گەلەری نەبێت، بەڵکو شیعر، ئەدەب، فیکر، موزیک، تەنانەت سینەما و کاری پێرفۆرمانسیش بێتە نێوییەوە." ئەم ژێرزەمینە بچووکە، میوانداریی گەورەترین ناوە ئەدەبییەکانی کوردی کردووە؛ لەوانە شاعیری گەورە شێرکۆ بێکەس کە دوو جار قەسیدەی لێرە خوێندووەتەوە، هەروەها نووسەر و بیرمەند بەختیار عەلی و چەندین ناوی دیکەی دیار.
ئەوەی "گەلەریی ئارام" لە ناوەندەکانی دیکە جیا دەکاتەوە، سرووشتە خێزانییەکەیەتی. ئێرە تەنیا گەلەرییەک نییە، بەڵکو کارگەیەکی هونەرییە کە هەموو ئەندامانی خێزانەکەی تێیدا هاوبەشن. ئارام بە شانازییەوە باس لە کارەکانیان دەکات و دەڵێت: "ناوەوەی گەلەرییەکە کۆکراوەی کاری خێزانەکەیە. کاری هاوژینەکەم ساهیرە محەممەدی تێدایە کە بە شێوازی کۆلاژ کار دەکات. کچەکەم دێرێ ستۆدیۆیەکی دەنگی لێرە هەیە و کچەکەی دیکەم دیانا خولیای سینەمای هەیە و کارەکانی فۆتۆ و ڤیدیۆ لێرە دەکات." تەنانەت کاروباری کارگێڕی و خاوێنکردنەوەی شوێنەکەش لەلایەن خودی خێزانەکەوە بە خۆشەویستییەوە ئەنجام دەدرێت.
خەونی ئەم خێزانە هونەردۆستە لێرەدا ناوەستێت. ئەوان هیوایان وایە رۆژێک بێت تەواوی ماڵەکەیان بگۆڕن بۆ ناوەندێکی رۆشنبیریی گەورە. ئارام دەڵێت: "خەونی من و خێزانەکەم ئەوەیە کە هەموو ماڵەکە ببێتە ناوەندێکی رۆشنبیری، بەڵام بێگومان ئەوە قورسە چونکە ئێمە لێرە دەژین." گەلەریی ئارام بۆ ماوەی 22 ساڵە لەنێو دڵی سلێمانیدا ماوەتەوە و سەلماندوویەتی کە هونەر کاتێک لەنێو خێزانەوە سەرچاوە دەگرێت، دەتوانێت تاریکترین ژێرزەمینەکان بکاتە جێژوانێکی هەمیشەیی بۆ رۆشنبیری.
