سەلام عەبدوڵڵا | سەرنووسەری رۆژنامەی خەبات (بەشی دووەم)
01:30
سەلام عەبدوڵڵا: كاك ئارام كەمترین نانی دەخوارد
05:50
سەلام عەبدوڵڵا: وەكو چەكدار بەشداریی شەڕی ناوخۆم نەكردووە
08:30
سەلام عەبدوڵڵا: هەندێک نووسینی سەردەمی شەڕی ناوخۆم لابردوون
چیرۆكی هەڵاتنی سەلام عەبدوڵڵا لە زیندان، گێڕانەوەیەکی درێژە و بە كتێبێك بەناوی (هەیئە) باسكراوە. لە بەرنامەی گفتوگۆی باڵۆن سەلام عەبدوڵڵا باسی ئەو ساتانە دەکات و دەڵێت "دوای راكردنم لە زیندان نەمدەتوانی لە ژوورێكدا بنووم كە دەرگاكەی دابخرایە یان پەنجەرەكانی پەردەی پێوە بوایە، تاوەكو ئێستاش زیندانەكانی گەڤەر و هیئە دوو كابووسی ژیانمن". شوێنەواری ئەشکەنجەی نێو زیندان هێشتا بە رووخساری سەلام عەبدوڵڵاوە دیارە، رەنج سەنگاوی لە پاش روانین لە رووخساری دەستی خستەسەر لووتی میوانەكەی گوتی "ئەو برینەی سەر لووتت مێژووی لەدایكبوونی منە ساڵی 1977 ئەو كاتەی كە مامۆستا سەلام دەستگیردەكرێت، بە قەمە لە لووتی دەدرێت، لەپاش دوو جار نەشتەرگەری، هێشتا شوێنەوارەكەی ماوە".
یەکێک لە پرسیارەکانی رەنج سەنگاوی لە بەرنامەکەدا، دەربارەی بەشداریکردنی سەلام عەبدوڵڵا بوو لە شەڕی ناوخۆ. ئەو راشکاوانە دەڵێت کە لە شەڕی ناوخۆدا بە نووسین بەشداری کردووە. سەلام عەبدوڵڵا پەشیمانە لەو مێژووەیە، هەر بۆیە بەشێك لە نووسینەكانی ئەو سەردەمی سڕیوەتەوە.
سەرسامبوون بە شیعرە كلاسیكییەكان بەتایبەت نالی، سالم، كوردی یەكێكی دیكەیە لە تایبەتمەندییەكانی سەلام عەبدوڵڵا "لە نەوە تازەكانیشدا شیعرەكانی رەنج سەنگاوی و مامۆستا حەمەسەعید حەسەن دەخوێنمەوە". كتێبی هەیئە كە بە 23 رۆژ نووسراوە، بەپێی قسەی سەلام عەبدوڵڵا بەشێكی لە زنجیرە درامای گەردەلولدا بەكارهاتووە، بەڵام بەبۆچوونی ئەو بەكارهێنانەكە خراپ بووە، لەسەر ئەوەش گلەیی لە دەرهێنەر جەلیل زەنگەنە كردووە، ئەو گوتیشی "كاتی خۆشی لە سلێمانی كتێبی هەیئە كرایە فیلم، بەڵام بەدڵم نەبوو، ئەوەی دڵم پێخۆشە ئێستا هیئە كراوەتە ئینگلیزی، ئەگەر وەبەرهێنەرێكی كوردی لە پشتبێت باشترین فیلمی لێدروست دەكرێت".
