تیمێکی تۆڕی میدیایی رووداو گەشتێکی بۆ هەرێمی تبت، ناسراو بە شیزانگ و "سەربانی جیهان" کرد، کە بەهۆی بەرزییەکەیەوە رێژەی ئۆکسجین 50% کەمترە و هەناسەدان تێیدا بە نرخە. مەهدی فەرەج، بەرپرسی نووسینگەی رووداو لە چین، لە بەڵگەفیلمێکدا ژیان، کولتوور و سرووشتی جوانی ئەو هەرێمە دەخاتەڕوو. تبت، کە بەشێکە لە زنجیرەچیاکانی هیمالایا و لووتکەی ئێڤرێستی لەخۆگرتووە، بەرزترین ناوچەی نیشتەجێبوونە لە جیهاندا. لە تبت، ئۆکسجین وەک کاڵایەکی بازرگانی مامەڵەی پێوە دەکرێت و بوتڵی ئۆکسجین لە ماڵ، بازاڕ و ئۆتۆمبێلەکاندا بووەتە بەشێکی دانەبڕاو لە ژیانی رۆژانە. کەمیی ئۆکسجین کاریگەریی لەسەر پێستی خەڵکەکەش داناوە و تۆختر دەردەکەون، بەڵام بە هێمنی و لەسەرخۆیی ناسراون.
تبت، بە رووبەری 1.2 ملیۆن کیلۆمەتر چوارگۆشە، دووەم گەورەترین هەرێمی چینە، بەڵام ژمارەی دانیشتووانەکەی تەنیا 3.6 ملیۆن کەسە. بەهۆی بای بەهێز و کەشوهەوای نالەبارەوە، گەشتە ئاسمانییەکان بەسەر ئاسمانەکەیدا کەمن. لهاسا، پایتەختی تبت، بە واتای "شوێنی خودا" دێت و بە بەرزایی 3650 مەتر لە ئاستی دەریاوە، یەکێکە لە بەرزترین شارەکانی جیهان. ئەم شارە بە "شاری خۆرەتاو"یش ناسراوە، چونکە ساڵانە زیاتر لە 3000 کاژێر تیشکی خۆری بەردەکەوێت.
لە تبت، بەهۆی نزمیی پەستانی هەواوە، ئاو لە پلەی 85ی سیلیزیدا دەکۆڵێت، بۆیە ئامادەکردنی خواردن کاتێکی زیاتری دەوێت. بۆ چارەسەرکردنی ئەمەش، مەنجەڵی فشاری تایبەت بەکاردەهێنرێن کە پلەی گەرمی دەگەیێننە سەروو 100 پلەی سیلیزی. کۆشکی پۆتاڵا، کە هەزار ژووری هەیە، یەکێکە لە بەناوبانگترین شوێنەوارەکانی تبت و پەرستگەی جۆخانگیش پیرۆزترین پەرستگەی بودییەکانە. جگە لە بودیزم، نزیکەی 700 کریستیانی کاسۆلیک و 12 هەزار موسڵمانیش لەو هەرێمەدا دەژین.
حکومەتی چین 90%ی بودجەی هەرێمی تبت دابین دەکات. زمانی فەرمیی خوێندن و کارگێڕی، زمانی ماندەرینی چینییە و حکومەت بایەخێکی زۆر بە خوێندنی پیشەیی دەدات. تێکڕای تەمەن لە تبت 72 ساڵە. هەرێمەکە خاوەنی سرووشتێکی دەوڵەمەندە بە ئاوی سازگار و گژوگیای دەگمەن کە بۆ دروستکردنی دەرمان بەکاردەهێنرێن. تبتییەکان خاوەنی کولتوور و میوزیکی تایبەت بە خۆیانن. فیستیڤاڵی "لۆسار" و "سەمای چام" دوو نموونەی دیاری دابونەریتی ئایینی و کۆمەڵایەتیی ئەوانن، کە تێیاندا جلوبەرگی رەنگاوڕەنگ و دەمامکی تایبەت بەکاردەهێنن.
ئەم بەڵگەفیلمەی تۆڕی میدیایی رووداو، لە رۆژی 18ی تشرینی دووەمی 2023 بڵاوکرایەوە.
