لە ئامەد دەنگبێژان شەش بەرهەم بە شێوازی 'ئاکاپێللا' بڵاودەکەنەوە

لە یەکەم تاقیکردنەوەیاندا، دەنگبێژان لەسەر بنەمای ئەدەب و هونەری زارەکی کوردی کاردەکەن، لە ئامەدی باکووری کوردستان بەرهەمەکانیان بە ژانری موزیکی جۆری "ئاکاپێللا" بڵاوکردەوە، کە هونەرێکی تایبەتە و لەبری موزیک؛ دەنگی مرۆڤ تێیدا بەکاردێت. لە ماوەی سێ مانگدا شەش کلیپی هاوبەشی دەنگبێژان و تیپی هونەری ئاکاپێللا بەرهەمێکیان بەناوی "دەنگەپێللا" بڵاوکردەوە. 

گەورەشارەوانیی ئامەد، دەستیکردووە بە ئەنجامدانی پرۆژەیەکی هونەری تایبەت بۆ ئاوێتەکردنی گۆرانییە فۆلکلۆرییە رەسەنەکانی کوردی و لەلایەن دەنگبێژانی باکووری کوردستانەوە دەگوترێن، بە شێوازی ژانری موزیکی "ئاکاپێللا"، ئامانج لەم پرۆژەیە، گەیاندنی هونەری کوردییە بۆ نەوەکانی داهاتوو کە لەسەر پلاتفۆڕمە ناوخۆیی و نێودەوڵەتییەکاندا بڵاودەکرێنەوە.   

لەم پرۆژەیەیدا دوو دەنگبێژی ژن و شەش دەنگبێژی پیاو کورد کە ئەندامانی ماڵی دەنگبێژانن، گۆرانییە فۆلکلۆرییەکانیان بەبێ میوزیک بڵاوکردەوە.  

سەرجەم کلیپەکانیش لە چەندین شوێنی جیاوازی ناو سووری ئامەد وێنەگیراون و بڕیاروایە بەرهەمەکان لە چوارچێوەی کۆنسێرتێکدا پێشکێشی بکرێن. 

سەیدهان کۆچ، دەنگبێژی ناسراوی کورد لە ئامەد رایگەیاند، نزیکەی 17 ساڵە ماڵی دەنگبێژان دامەزراوە، بەردەوام میوانی ناوخۆ و بیانی سەردانی دەکەن و هەموو جۆرە گۆرانییەکی فۆلکلۆری رەسەنی کوردییان پێشکێش دەکرێن. 

سەیدهان کۆچ، لەبارەی ئەم پرۆژە نوێیە هاوبەشەی نێوان دەنگبێژان و تیپی ئاکاپێللا کە تەواوی ئەندامانی لە گەنجان پێکهاتووە، گوتی: "دەنگبێژان گوێیان زۆر هەستیارە، خۆیشیان شاعیرن و بایەخ بە موزیک دەدەن. لەسەر ئەم بنەمایە هیچ کێشەیەکمان لە خۆگونجاندن لەگەڵ ئەم شێوازە نوێیەی ژانرە موزیکییە نەبوو، دوای چەند جارێک گوێگرتنمان، یەکسەر خۆمان گونجاند. گەنجەکانیش دەنگی ئێمەیان زۆر بەدڵ بوو، ئەوانیش لەگەڵ تۆنی دەنگەکانی ئێمە خۆیان گونجاند و بەرهەمێکی جوانی لێ دەرچوو".

محەممەد مەسعود تانریکوڵو، سەرۆکی فەرمانگەی کاروباری کولتوور و کۆمەڵایەتیی سەر بە گەورەشارەوانیی ئامەد، رایگەیاند: "جگە لە رۆژانی دووشەممە، دەرگەی ماڵی دەنگبێژان هەمیشە کراوەیە و بەهۆی سەردانیکارانی بیانی، بەردەوام کۆڕی دەنگبێژان دەگوترێت و بەمشێوەیە کولتووری رەسەنی هونەری ئەم شارە پێشکێشی میوانەکان دەکەین".

تانریکوڵو، راشیگەیاند، "لە رووی بەراوردکارییەوە، شێوازی ئاکاپێللا نزیکە لە کولتووری دەنگبێژی. ژانری ئاکاپێللا لە چاخی ناوەڕاست لە سەردەمی دەسەڵاتی کەنیسەکانی ئەوروپادا لە سرووتە ئاینییەکاندا بەکاردەهات، دواتر بە هەموو جیهاندا بڵاوبووەوە. خاڵی هاوبەشی دەنگبێژی و ئاکاپێللا نەبوونی موزیکە، تەنیا پشت بە دەنگی مرۆڤ دەبەسترێت. ئێمەش ویستمان لە رێگەی ئەم پرۆژەیەوە رایەڵێک لە نێوان هونەری رۆژئاوایی و رۆژهەڵاتی دروست بکەین. بەتایبەتی ئامانجمان لەم پرۆژانە ویستمان کولتووری رەسەنمان بە گەنجان و نەوەی داهاتوومان بگەیێنین."

محەممەد مەسعود تانریکوڵو رایگەیاند، لەم پرۆژەیەدا شەش دەنگبێژ و 14 هونەرمەندی ئاکاپێللا بەشدارن. لە ماوەی سێ مانگدا شەش کلیپیان تۆمارکردووە.