رووداو دیجیتاڵ
فیلمی سینەمایی (My Uncle Jens) لە نووسین و دەرهێنانی بڕوا وەهابپوور، دەرهێنەری رۆژهەڵاتی کوردستان، وەک فیلمی دەستپێکی 12یەمین فێستیڤاڵی نێودەوڵەتیی فیلمی دهۆک پێشاندەدرێت.
فیلمەکە یەکەم ئەزموونی درێژی دەرهێنەرە و ژانرەکەی کۆمیدی-دراماییە، ماوەکەی 98 خولەکە، بەرهەمی نەرویجە و بە زمانی کوردی و نەرویجییە.
لەم بەرهەمە سینەماییەدا، پەیمان عەزیزپوور، هەمزە ئاگشوشی و سارا فرانسیسکا برین رۆڵی سەرەکی تێدا دەگێڕن.
(My Uncle Jens) باس لە مامۆستایەکی گەنج دەکات لە ئۆسلۆ بە ناوی ئاکام، کە سەردانی لەناکاوەی مامی لە رۆژهەڵاتی کوردستانەوە ژیانی تێکدەدات و دەبێتە هەوێنێک بۆ بەکەیگەیشتنی دوو کولتووری جیاواز.
پەیمان عەزیزپوور، ئەکتەریی کورد و بەشداربووی فیلمەکە، بە رووداوی راگەیاند، بۆ پێشاندانی فیلمەکە لە فێستیڤاڵدا کە وەک فیلمی دەستپێک دیاریی کراوە، لەگەڵ دەرهێنەر و مۆنتێری فیلمەکە ئامادەبووە و ئێستا لە دهۆکن.
ئاماژەی بۆ ئەوەشکرد، فیلمەکە دوو پێشاندانی بۆ دەکرێت، یەکەمیان لە دەستپێکی فێشتیڤاڵە، دووەمیان کاژێر 8:00ـی شەوی سبەی چوارشەممە 10ـی کانوونی یەکەمی 2025 لە سینەما ماکس لە دهۆك مۆڵ دەبێت.
.jpg "پەیمان عەزیزپوور و هەمزە ئاگشوشی لە فیلمی (My Uncle Jens)")
ئەمڕۆ سێشەممە، 12یەمین فێستیڤاڵی نێودەوڵەتیی فیلمی دهۆک بە دروشمی (وشکەساڵی) و بە بەشداربوونی 110 فیلمی کوردی و بیانی دەستپێدەکات و ماوەی هەفتەیەک دەخایەنێت.
.jpg "پۆستەری فیلمی (My Uncle Jens)")
پەیمان عەزیزپوور، لە 2024 لە زنجیرەی (Midsummer Night) لەگەڵ قادر تاڵەبانی، ئەکتەری کورد رۆڵی گێڕاوە کە لە نێتفلێکس بڵاوکرایەوە و لە هەفتەی یەکەمی پێشاندانی لەو تۆڕە، پڕبینەرترینی وڵاتانی سکەندەنافیا بووە.
پەیمان عەزیزپوور، خەڵکی رۆژهەڵاتی کوردستانە و لە 1995 لەدایکبووە و لە نەرویج دەژی، لە چەند بەرهەمێکی شانۆیی، تەلەڤزیۆنی و سینەماییدا رۆڵیگێڕاوە.
فیلمی (My Uncle Jens) لە 2025ـدا لە چەندین فێستیڤاڵی جیهانیدا بەشداربوو، یەکەم بەشداریی لە 10ـی ئادار لە فێستیڤاڵی فیلمی (SXSW) لە ئەمریکا دەستیپێکرد و هەفتەیەک دواتر لە فێستیڤاڵی فیلمی کۆسمۆراما لە نەرویج نمایشکرا، بەر لەوەی لە 4ـی نیسان لەو وڵاتە بچێتە سەر شاشەکان.
فیلمەکە لە 20ـی حوزەیران گەیشتە فێستیڤاڵی فیلمی تایپێ لە تایوان و دوای نمایشکردنی لە 22ـی ئاب لە سوێد، لە وەرزی پاییزدا بەشداریی لە فێستیڤاڵی نێودەوڵەتیی فیلمی لایدن لە هۆڵەندا کرد و لە 15ـی تشرینی دووەمیشدا لە فێستیڤاڵی فیلمی (Northern Lights) لە بیلارووس بەشداربوو.
.png&w=3840&q=75)
