رووداو دیجیتاڵ
هاووڵاتییانی ئەمریکا لە هەڵبژاردنەکانی نیوەی خولدا روو لە سندووقەکانی دەنگدان دەکەن؛ پرۆسەیەک کە بە راپرسییەکی سەرتاسەری و یەکلاکەرەوە لەسەر خولی دووەمی سەرۆکایەتیی دۆناڵد ترەمپ دادەنرێت، لە کاتێکدا دیموکراتەکان لە بەردەم دەرفەتێکی مێژووییدان بۆ وەرگرتنەوەی زۆرینەی هەردوو ئەنجوومەنی نوێنەران و پیران.
لەدەستدانی ئەنجوومەنی نوێنەران لەلایەن کۆمارییەکانەوە، دەسەڵاتی ئەوە دەداتە دیموکراتەکان تەواوی کارنامەی یاسادانانی ترەمپ پەکبخەن و لێکۆڵینەوە لە ئیدارەکەی دەستپێبکەن. هەروەها لەدەستدانی ئەنجوومەنی پیرانیش، توانای سەرۆک بۆ دەستنیشانکردنی دادوەرانی دادگەی باڵا و بەرپرسانی باڵا دەپێچێتەوە.
ئەم هەڵبژاردنە لە کاتێکدایە بەهۆی بەرزبوونەوەی هەڵاوسان، تێچووی بژێوی، سزاکانی سەر هاوردەکردن و گرژییە سەربازییەکان لەگەڵ ئێران، ئاستی رازیبوونی جەماوەر لە ترەمپ بۆ نزیکەی 30٪ دابەزیوە.
کێبڕکێ لەسەر چەند کورسییە؟
لە دەنگدانی ئەمڕۆدا، چارەنووسی ئەم پۆستانە یەکلادەکرێتەوە:
ئەنجوومەنی نوێنەران: سەرجەم 435 کورسییەکە.
ئەنجوومەنی پیران: 35 کورسی لە کۆی 100 کورسی.
حاکمەکان: پۆستی حاکمی 36 ویلایەت.
دیموکراتەکان تەنیا پێویستیان بە بردنەوەی سێ کورسیی زیاترە لە ئەنجوومەنی نوێنەران و چوار کورسی لە ئەنجوومەنی پیران تاوەکو زۆرینەی کۆنگرێس لە دەستی کۆمارییەکان دەربهێنن. پێشبینییەکانی دەزگای (دیسیشن دێسک ئێچ کیو) دەریدەخەن کە ئەگەری هەیە دیموکراتەکان 241 کورسیی ئەنجوومەنی نوێنەران و بە زۆرینەیەکی کەم (52 بەرامبەر 48) ئەنجوومەنی پیرانیش ببەنەوە.
کەمپەینی ئەم هەڵبژاردنە زیاتر لە 11 ملیار دۆلاری لە رێکلامی سیاسی و میدیاییدا تێچووە، کە تێیدا ئیلۆن مەسک، ملیاردێری ئەمریکی سەتان ملیۆن دۆلاری بۆ سەرخستنی کۆمارییەکان خەرج کرد. هاوکات پێش دەستپێکردنی دەنگدانی گشتی، زیاتر لە 57 ملیۆن هاووڵاتی بە شێوازی پێشوەختە دەنگیان داوە.
سەرەڕای گرنگیی پرسە ئابوورییەکان، ترەمپ لە دوایین گوتاری هەڵمەتی هەڵبژاردنیدا کەمتر باسی لە ئابووری کرد، ئەمەش وایکرد چەک شومەر، سەرکردەی دیموکراتەکان لە ئەنجوومەنی پیران گوتارەکەی بە "پەیامێکی بێهێز و مایەی بەزەیی" وەسف بکات. لە بەرامبەردا، کۆمارییەکان بانگەشەی ئەوە دەکەن کە سیاسەتەکانی ترەمپ لە کەمکردنەوەی باج و سنووردارکردنی کۆچبەران لە قازانجی وڵات بووە و متمانەی تەواویان بە بردنەوە هەیە.
گومانی ساختەکاری و هەڕەشەی ڤیتۆ
هاوشێوەی هەڵبژاردنەکانی پێشوو، ترەمپ چەندین جار گومانی لە پرۆسەکە دروستکردووە و دیموکراتەکانی بە فێڵکردن تۆمەتبار کردووە. لە کالیفۆڕنیا و ئالاسکاش کۆمارییەکان هەوڵی یاساییان دا بۆ هەڵوەشاندنەوەی بەشێک لە دەنگەکان، بەڵام دادگەکان داواکارییەکانیان رەتکردنەوە.
دۆناڵد ترەمپ، کە لە کۆشکی سپییەوە چاودێریی ئەنجامەکان دەکات، هەڕەشەی ئەوەی کردووە ئەگەر کۆنگرێسیش بدۆڕێنێت بەرەنگاری دیموکراتەکان دەبێتەوە و لە لێدوانێکدا گوتی: "ڤیتۆی هەموو شتێک دەکەم"، هەرچەندە ئاماژەی بەوەش کردووە کە لە کۆتاییدا رەنگە لەگەڵ دیموکراتەکان رێککەوتن بکات.
