رووداو دیجیتاڵ
لە کاتێکدا ئەڵمانیا رووبەڕووی قەیرانی سیاسی و ئابووری بووەتەوە، 16 سەرۆکوەزیرانی هەرێمەکانی ئەو وڵاتە لە بەرلین کۆبوونەوە بۆ تاوتوێکردنی کێشە هاوبەشەکان، لەوانە هەڵاوسان، ئاسایش و بەرزبوونەوەی نرخی وزە.
یەکێک لە تەوەرە سەرەکییەکانی کۆبوونەوەکە، مەترسیی بەهێزبوونی پارتی راستڕۆی توندڕەوی "ئەڵتەرناتیڤ بۆ ئەڵمانیا" (AfD) بوو، بەتایبەت لە هەرێمەکانی رۆژهەڵاتی وڵاتەکە.
گۆردۆن شنیدەر، سەرۆکوەزیرانی هەرێمی راینلاند ڤاڵس، لەوبارەیەوە گوتی، "زیادبوونی دەنگەکانی پارتی (AfD) جێگەی نیگەرانییە، بەڵام ئێمە لە هەرێمەکاندا بە کارکردنی هاوبەش، سەقامگیریی دەوڵەت دەپارێزین."
هەر لە کۆبوونەوەکەدا، سەرۆکوەزیرانەکان جەختیان لە رووبەڕووبوونەوەی توندڕۆی و تیرۆر کردەوە. ئۆلاف لیس، سەرۆکوەزیرانی هەرێمی نیدەرساکسن، رایگەیاند، "دەبێت بە شێوەیەکی کاریگەر رووبەڕووی دابینکردنی دارایی بۆ پێکهاتە توندڕۆ و تیرۆریستییەکان ببینەوە."
ناوبراو هەروەها داوای ناردنەوەی خێراتری تاوانباران و کەسە مەترسیدارەکانی کرد، بەتایبەت بۆ ئەفغانستان و سووریا و گوتی، "ئەمە بابەتێکی روون و ئاشکرایە."
سەبارەت بە بەرزبوونەوەی نرخی کارەبا، هەرێمەکان داوایان لە حکومەتی فیدراڵی کرد بەپەلە باجی سەر وزە کەم بکاتەوە بۆ سووککردنی بارگرانیی سەر هاووڵاتییان و کارگەکان. هاوکات جەخت لە گرنگیی تەرخانکردنی بودجە بۆ گەشەپێدانی بەندەرەکان و کەرتی دەرمان کرایەوە.
