رووداو دیجیتاڵ
کۆمپانیای ئەپڵ لە رێوڕەسمێکدا یەکەمین مۆبایلی چەماوەی لە مێژووی خۆیدا بە ناوی (iPhone Duo) ئایفۆن دو-وۆ ناساند. ئەمە یەکەم تاقیکردنەوەی گەورەیە بۆ جۆن تێرنۆس، بەڕێوەبەری نوێی ئەپڵ، کە لە 1ـی ئەیلوول لە شوێنی تیم کووک دەستبەکاربووە.
تایبەتمەندییەکانی iPhone Duo بە کورتی:
شێوەکەی: کاتێک قەد دەکرێت، قەبارەکەی هێندەی پاسپۆرتێک دەبێت؛ واتە تێکەڵەیەکە لە مۆبایل و تابلێت. کاتێک داخرابێت مۆبایلێکی ئاساییە، کاتێکیش دەیکەیتەوە دەبێتە شاشەیەکی گەورە هاوشێوەی ئایپاد.
دوو شاشە: شاشەیەکی تەواوی لە دەرەوە هەیە، لەگەڵ شاشەیەکی گەورەی ناوەوە لە کاتی کرانەوەدا، هەروەها چەندین کامێرای لەسەرە.
چارەسەرکردنی کێشەی قەدبوونەکە: ئەپڵ دەڵێت، توانیویەتی شوێنی نوشتانەوە و هێڵی نێوەڕاستی شاشەکە زۆر کەم بکاتەوە، تاوەکو وەک مۆبایلە چەماوەکانی دیکە بە زەقی دیار نەبێت.
نرخەکەی: لە 1,999 دۆلارەوە دەستپێدەکات، واتە کەمێک لە مۆبایلی Galaxy Z Fold8ـی سامسۆنگ گرانترە.
بەرهەمە نوێیەکانی دیکەی ئەپڵ:
ئایفۆن 18 پرۆ و پرۆ ماکس: ئەپڵ زنجیرەی نوێی مۆبایلەکانی بە ناوی iPhone 18 Pro بە نرخی 1,199 دۆلار و iPhone 18 Pro Max بە نرخی 1,299 دۆلار راگەیاند، کە بەراورد بە مۆدێلەکانی پار 100 دۆلار گرانتر بوون. کامێرای ئەم مۆبایلانە باشتر کراوە و بەکارهێنەر دەتوانێت بە دەستی خۆی کرانەوەی هاوێنەکەی (Aperture) رێکبخات.
ئایفۆن 18ـی ئاسایی دیار نییە: جێگەی سەرنجە کە ئەپڵ لەم کۆنگرەیەدا ئایفۆن 18ـی ئاسایی و هەرزانتری رانەگەیاند و پێدەچێت لە کاتێکی دیکەدا بیخاتە بازاڕەوە.
بیستۆک و کاتژمێری نوێ: وەشانێکی نوێی بیستۆکەکانی AirPods و کاتژمێری زیرەکی ئەپڵ بە هەستەوەری زۆر پێشکەوتووتری لێدانی دڵ ناسێندران.
بۆچی مۆبایلە نوێیەکان گرانتر بوون؟
گەشەکردنی خێرای بواری ژیریی دەستکرد بووەتە هۆی دروستبوونی قەیران لە بەرهەمهێنانی چیپە ئەلیکترۆنییەکان، چونکە کۆمپانیاکانی ژیریی دەستکرد چیپێکی زۆر دەکڕن. ئەمەش کەرەستە تەکنەلۆژییەکانی لە بازاڕدا کەمکردووەتەوە و وایکردووە تێچووی دروستکردنی مۆبایل لە سەرتاسەری جیهاندا 27٪ بەرزبێتەوە.
کڕین بە قیست:
ئەپڵ بە هاوبەشی لەگەڵ کۆمپانیای کلارنا (Klarna) لە ئەمریکا سیستمی کڕینی بە قیستی مانگانە راگەیاند، کە کڕیاران دەتوانن بە پێدانی مانگانە نزیکەی 50 دۆلار و بەرەو سەرەوە، مۆبایلە نوێیەکان بەدەستبهێنن.
ململانێ لەگەڵ کۆمپانیاکانی دیکە:
سامسۆنگ لە ساڵی 2019ـەوە یەکەم کۆمپانیا بوو کە مۆبایلی چەماوەی خستە بازاڕەوە. هاوکات لەم هەفتەیەشدا کۆمپانیای هواویی چینی مۆبایلێکی چەماوەی بە سێ شاشەوە بە ناوی Mate XT 2 بە نرخی 2,800 دۆلار راگەیاند، کۆمپانیای شیاومیش مۆبایلی 18 Foldـی بە نرخی 1,540 دۆلار خستەڕوو. شارەزایانی بواری تەکنەلۆژیا دەڵێن، ئەپڵ بۆ ئەم بوارە، کێبڕکێی مۆبایلە چەماوەکان لە جیهاندا بەتەواوی دەگۆڕێت.
