رووداو-دیجیتاڵ
بەپێی راپۆرتی رێکخراوی هاوکاری و گەشەپێدانی ئابووری (OECD) بۆ ساڵی 2026، تورکیا لە ماوەی نێوان ساڵانی 2019 بۆ 2025 رێژەی گەشتیارانی نێودەوڵەتی %21 زیادکردووە، بەمەش بووەتە چوارەم وڵات لەسەر ئاستی جیهان کە زۆرترین گەشەکردنی لە راکێشانی گەشتیاراندا لە دوای پەتای کۆرۆنا تۆمارکردووە.
لە راپۆرتەکەدا کە لەژێر ناونیشانی "ئاڕاستەکان و سیاسەتەکانی گەشتوگوزار 2026" بڵاوکراوەتەوە، ئاماژە بەوە کراوە کە ژمارەی گەشتیارانی نێودەوڵەتی بۆ وڵاتانی ئەندام لە رێکخراوی OECD لە ساڵی 2025دا بە رێژەی 3.4٪ زیادیکردووە و گەیشتووەتە 847 ملیۆن گەشتیار.
لەم پۆلێنکردنەدا، ژاپۆن بە رێژەی %34ی گەشەکردن لە پلەی یەکەم، نەرویج بە %28 لە پلەی دووەم، دانیمارک بە %22 لە پلەی سێیەم و تورکیاش بە رێژەی %21 لە پلەی چوارەمی لیستی ئەو وڵاتانەدا دێت، کە زۆرترین گەشتیاریان راکێشاوە.
فیروز باغلیکایا، سەرۆکی یەکێتیی بریکارەکانی گەشتوگوزاری تورکیا (TÜRSAB) رایگەیاند: "تورکیا خاوەنی ئیکۆسیستەمێکی بەهێزی گەشتیارییە، کە توانیویەتی قەیرانە جیهانی و ناوچەییەکان بەڕێوەببات."
باغلیکایا ئاماژەی بەوەشکرد، لێهاتوویی بریکارەکانی گەشتوگوزار لە بەڕێوەبردنی قەیرانەکاندا هۆکاری سەرەکیی ئەم خۆڕاگرییەیە.
راپۆرتەکە تیشکی خستووەتە سەر ئەوەی کە ململانێکانی رۆژهەڵاتی ناوەڕاست و گرژییە جیۆپۆلیتیکییەکان کاریگەرییان لەسەر رێڕەوی گەشتە ئاسمانییەکان و تێچووی گەشتیاران دروستکردووە، بەڵام تورکیا توانیویەتی کێبڕکێ بکات و گەشەکردن تۆمار بکات.
تورکیا لە ساڵی 2025 دا پێشوازی لە 52.7 ملیۆن گەشتیار کردووە و داهاتی کەرتی گەشتیاری گەیشتە 65.2 ملیار دۆلار.
لە پێنج مانگی یەکەمی ئەمساڵدا 17.6 ملیۆن گەشتیار سەردانی تورکیایان کردووە.
تورکیا ئامانجیەتی داهاتی کەری گەشتیاری لە کۆتایی 2026دا بگەیەنێتە 68 ملیار دۆلار.
.jpg&w=3840&q=75)
