رووداو دیجیتاڵ
بەگوێرەی راپۆرتە رۆژنامەڤانییەکانی ئیسپانیا، کارگێڕیی یانەی بارسێلۆنا دەستیکردووە بە داڕشتنی پلانی داهاتووی پڕۆژە وەرزشییەکەی و ناوی سیسک فابریگاس، راهێنەری ئێستای یانەی کۆمۆی ئیتاڵیی لە سەرووی لیستی بەربژێرەکان داناوە، بۆ ئەوەی لە داهاتوودا ببێتە جێگرەوەی هانزی فلیک.
لیژنەی وەرزشیی بارسێلۆنا بە سەرۆکایەتیی دێکۆ، کۆدەنگییەکی تەواویان لەسەر فابریگاس هەیە و وەک بژاردەی یەکەم بۆ راهێنەرایەتیی داهاتووی بلاوگرانا دەیبینن. کارگێڕیی یانەکە چاوەڕێی رۆیشتنی فلیک ناکات و لە نزیکەوە چاودێریی بەرەوپێشچوونەکانی فابریگاس دەکات، تەنانەت پەیوەندیی سەرەتاییش هەبووە بۆ زانینی ئەگەری گەڕانەوەی بۆ یانەکە لە داهاتوودا.
سەرەڕای ئەم هەنگاوە، بەرپرسانی بارسا بە تەواوی لە کارەکانی هانزی فلیک رازین کە گرێبەستەکەی تاوەکو ساڵی 2028 بەردەوامە و بژاردەی درێژکردنەوەشی بۆ ساڵێکی دیکە تێدایە، بەڵام دەیانەوێت بۆ هەر ئەگەرێکی چاوەڕواننەکراو، گواستنەوەیەکی ئاسان و بێکێشە لەسەر ئاستی راهێنەرایەتی مسۆگەر بکەن.
ئەزموونە سەرنجڕاکێشەکەی فابریگاس لەگەڵ کۆمۆ:
وەرزی 2023-2024: بەشداربوو لە سەرخستنی یانەکە بۆ خولی پلەیەکی ئیتاڵیا (سێری ئا).
وەرزی 2024-2025: وەک راهێنەری یەکەم، توانی یانەکە بگەیەنێتە پلەی دەیەمی ریزبەندی.
وەرزی 2025-2026: مێژووی نووسییەوە و بە کۆکردنەوەی 71 خاڵ (20 بردنەوە، 11 یەکسانبوون و 7 دۆڕان)، پلەی چوارەمی بەدەستهێنا و بۆ یەکەمجار لە مێژوودا کۆمۆی گەیاندە چامپیۆنزلیگ.
وەرزی ئێستا (2026-2027): لە چامپیۆنزلیگدا ئەنجامی گەورەی تۆمارکردووە، دیارترینیان بردنەوە بوو لە لانس بە ئەنجامی 9-1 و شکستپێهێنانی مانچێستەر یونایتد بە ئەنجامی 4-1.
فابریگاس کە لە نێوان ساڵانی 2011 بۆ 2014 یاریزانی بارسێلۆنا بووە، پێشتر خەونی خۆی بۆ راهێنەرایەتیکردنی یانە کەتەلۆنییەکە نەشاردووەتەوە. شێوازی یاریکردنی پشتبەستوو بە کۆنترۆڵکردنی تۆپ و پشتبەستن بە یاریزانە لاوەکان، وایکردووە ببێتە گونجاوترین بژاردە بۆ فەلسەفەی بارسا.




