رووداو دیجیتاڵ
لە یارییەکی لووتکەدا، یانەی بارسێلۆنا توانی بە ئەنجامی 2-1 لە یانەی ئاتلێتیکۆ مەدریدی خاوەن یاریگا بباتەوە، ئەمەش لە یارییەکانی گەڕی 12ی خولی لالیگای ئیسپانیا.
یارییەکە هەر لە سەرەتاوە بە ئاگرین دەستی پێکرد، کاتێک لە خولەکی 10دا جولیانۆ سیمیۆنی توانی گۆڵی پێشکەوتن بۆ ئاتلێتیکۆ تۆمار بکات، ئەمەش دوای هەڵەیەکی هێڵی بەرگری کەتەلۆنییەکان.
بەڵام کەتەلۆنییەکان زوو خۆیان گرتەوە فێرمین لۆپێز بووە پاڵەوانی یارییەکە و لە خولەکی 45دا گۆڵی یەکسانکردنەوەی بۆ بارسێلۆنا تۆمار کرد و یارییەکەی بە یەکسانی گەڕاندەوە بۆ ژووری جلگۆڕین.
لە نیوەی دووەمدا، ئاتلێتیکۆ چەندین هەڵی زێڕینی لە دەست دا، دیارترینیان لە رێگەی جولیان ئالفارێزـەوە بوو کە چەندین هەلی ئاسانی فەوتاند، ئەمەش لە كاتێکدا بوو کە لە هاوینی رابردوودا ناوی بە یانە كەتەلۆنییەکەوە بەسترابوو.
هانزی فلیكی راهێنەری بارسێلۆنا بە گۆڕانکارییەکانی توانی کۆنتڕۆڵی یارییەکە بکات؛ سەرەتا ئێریک گارسیا و گاڤی بەكارھێنا بۆ زیندووکردنەوەی هێڵی ناوەڕاست، پێش ئەوەی لە خولەکی 66دا دووبارە فێرمین لۆپێز بە لێدانێکی جوان گۆڵی دووەم و سەرکەوتنی بۆ بلاوگرانا تۆمار بکات. لە دوایین خولەکەکاندا فلیك کەریم ئادیێمیـش بەشداری پێکرد تاوەکو ئەنجامەکە بپارێزێت.
بەم سەرکەوتنە مەزنە، هانزی فلیك و یاریزانەکانی لە لووتکەی لالیگا خۆیان قایمتر کرد و کۆی خاڵەکانیان گەیاندە 33 خاڵ، لە بەرامبەردا ئاتلێتیکۆ مەدرید بە سەرکردایەتی دیێگۆ سیمیونی بە 28 خاڵ لە پلەی سێیەمی ریزبەندی خولەکەدا ماوەوە.
