رووداو دیجیتاڵ
یانەی نیوکاسڵ یونایتد دەتوانێت دەرفەتێکی سەرنجڕاکێشی بۆ خۆی بقۆزێتەوە ئەگەر کەریم بنزیمای هێرشبەری فەرەنسی بڕیاری گەڕانەوەی بۆ ئەورووپا بدات، کە ئێستا دوای جێهێشتنی یانەی هیلالی سعودی بێ یانەیە.
بنزیما لە مانگی یەکی ساڵی 2026 لە یانەی ئیتیحادەوە بە گواستنەوەی بێ بەرامبەر پەیوەندی بە یانەی هیلالەوە کرد، بەڵام یانە سعودییەکە گرێبەستی لەگەڵ ئۆلی واتکینزی هێرشبەری ئینگلیزی واژۆکرد، ئەمەش ناچاری کرد لە گواستنەوەکانیئەم هاوینەدا ئەستێرە فەرەنسییەکە ئازاد بکات.
هەرچەندە بنزیما لەڕووی تیۆریەوە دەتوانێت وەک یاریزانێکی ئازاد بچێتە هەر تیپێکەوە، بەڵام دۆخی گرێبەستی فراوانتری لە سعودیە وا دەکات گواستنەوەی بۆ یانەیەکی دەرەوەی ئەو وڵاتە زۆر قورس بێت.
ئەمەش لە رێکەوتنێکەوە سەرچاوە دەگرێت کە بنزیما بە پلەی باڵیۆز لەگەڵ سعودیە واژۆی کردووە، پەیوەندی بە سندوقی وەبەرهێنانی گشتییەوە هەیە، کە تاوەکو ساڵی 2030 درێژدەبێتەوە.
میدیای فەرەنسا ئاشکرایکردووە، یانەی لیۆن لە ماوەی گواستنەوەی هاوینەدا هەوڵی دووبارە گرێبەستکردن لەگەڵ بنزیمای داوە، پەیوەندی بە نێوەندگیرێکەوە کردووە بۆ ئەوەی ئەگەری گەڕانەوەی هێرشبەرە پێشووەکەیان بکۆڵێتەوە.
ئامادەبوو بەخۆڕایی یاری بکات.. بۆچی بنزیما نەگەڕایەوە لیۆن؟
بەگوێرەی راپۆرتەکە، یاریزانە تەمەن 39 ساڵەکە ئامادەیی خۆی بۆ گەڕانەوە بۆ یانەی لیۆن بەبێ هیچ پارەیەکی گواستنەوەی یاریزانان نیشان دابوو، ئەمەش لەلایەن ماتیۆ لویس جان، بەڕێوەبەری وەرزشی یانە فەرەنسییەکە پشتڕاستکرایەوە.
ئەو گوتی "راستە ئەم هاوینە پەیوەندیمان لەگەڵ نێوەندگیرێک هەبووە سەبارەت بە کەریم، ئەوەندەی من پەیوەندیم پێوە هەیە، لەوە زیاتر نەڕۆیشت، چونکە دۆخی گرێبەستی کەریم وایکرد کە مەحاڵ بێت".
ئاماژەی بەوەشکردووە، کەریم یاریزانێکی ناوازەیە، تەنانەت هەوڵمان نەدا لەوە زیاتریش بچین، چونکە دەمانزانی دۆخەکە چەندە سەختە.
بەگوێرەی RMC، بنزیما دوو بژاردەی سەرەکی لەبەردەمدایە ئەگەر بیەوێت ئەو سوودە داراییانەی پەیوەستن بەم رێکەوتنە بمێنێتەوە، یان وازهێنان لە تۆپی پێ یان روو لە یانەیەکی دیکە لە خولی پیشەگەری سعودیە بکات.
بەگوێرەی راپۆرتەکە، گواستنەوەی بۆ یانەیەکی دەرەوەی سعودیە، رێککەوتنەکە پووچەڵ دەکاتەوە و گواستنەوەی بۆ ئەورووپا لەڕووی داراییەوە لە رادەبەدەر ئاڵۆز دەبێت.
سەرچاوەیەکی نزیک لەو بابەتە ئەگەری گواستنەوەی بنزیما بۆ یانەیەکی ئەورووپی لەڕووی ئابوورییەوە بە 'مەحاڵ' و لەڕووی وەرزشییەوە بە 'مەحاڵ' ناوبرد، بە لەبەرچاوگرتنی دۆخی ئێستای.
بۆچی نیوکاسڵ یونایتد لە وێنەکەدایە؟
بەگوێرەی ماڵپەڕی sportwitness، ناوی نیوکاسڵ یونایتد بەشێوەیەکی بەرچاو دەرکەوتووە، بەتایبەتی کە خاوەندارێتی سندوقی وەبەرهێنانی گشتی سعودیە PIF کە یاریزانێکی سەرەکییە لەو رێککەوتنەی کە بنزیما بە سعودیە دەبەستێتەوە.
ئەگەر هێرشبەرە فەرەنسییەکە بیەوێت ئەزموونێکی نوێ لە تۆپی پێی ئەورووپادا بەدەستبهێنێت، ئەوا نیوکاسڵ لەڕووی تیۆریەوە دەتوانێت بژاردەیەک بێت، کە بۆ هەموو لایەنەکان نوێنەرایەتی بکات. یەکێتیی تۆپی پێی ئینگلتەرا دەتوانێت گرێبەستی ئێستای بنزیما بپارێزێت لەکاتێکدا یاری بۆ یانەیەکی خاوەندارێتی دەکات.
لە راپۆرتەکەدا جەخت لەوە کراوەتەوە، ئەگەر سندوقی وەبەرهێنان بڕیار بدات رێگە بە گەڕانەوەی بنزیما بدات بۆ ئەورووپا، بەدڵنیاییەوە نیوکاسڵ یەکێک دەبێت لە دیارترین چارەسەرەکان کە دەبێت لەبەرچاو بگیرێت.
کەریم بنزیما 16 یاری لەگەڵ یانەی هیلال ئەنجامداوە و 10 گۆڵی تۆمارکردووە و 5 ئەسیستیشی کردووە. وەرزی رابردوو لەگەڵ ئەوان نازناوێکی بەدەستهێنا، ئەویش جامی پاشا بوو.
