رووداو دیجیتاڵ
راپۆرتە رۆژنامەوانییەکانی فەرەنسا ئاشکرایان کردووە کە پیلانێکی تاوانکاریی مەترسیدار پووچەڵکراوەتەوە کە ئامانجی رفاندنی کیلیان ئێمباپێ، ئەستێرەی یانەی ریال مەدرید بووە، لەگەڵ 25 کەسایەتی دیکە لە یاریزانانی تۆپی پێ، گۆرانیبێژانی راپ و سەرمایەدارە دەوڵەمەندەکان.
رۆژنامەی مارکای ئیسپانی ئاماژەی بەوە کردووە، دەسەڵاتدارانی فەرەنسا گەنجێکی 18 ساڵانیان بە ناوی 'کلیمان' دەستگیرکردووە، کە سەرکردایەتی رێکخراوێکی تاوانکاریی کردووە بە ناوی خوازراوی 'لیستەر زد'.
رۆژنامەکە روونیکردووەتەوە کە تۆمەتبارەکە ئێستا سزای زیندانی لەسەر دۆسێیەکانی دزیی چەکدارانە و بازرگانی سێکسی بەسەر دەبات، بەڵام لێکۆڵینەوەکان ئاشکرایان کردووە کە لە ناو زیندانەکەیەوە بەردەوام بووە لە بەڕێوەبردنی ئەندامانی باندەکە، و ئەپڵیکەیشنی سناپ چاتی بۆ دەرکردنی فەرمانەکان بەکارهێناوە.
ئاماژەی بەوەش کردووە، پۆلیس توانیویەتی ناسنامەکەی دیاری بکات دوای لێکۆڵینەوە لە کردەوەیەکی دزیی کۆگایەکی کاژێرە گرانبەهاکان لە شاری نوی-سور-سێن لە مانگی نیسانی رابردوودا.
لە کاتی پشکنینی هەردوو مۆبایلەکەیدا، بەرپرسان لیستێکیان دۆزیوەتەوە کە ناونیشان و زانیاری 26 ئامانجی تێدابووە کە رێکخراوەکە پلانی رفاندنیانی هەبووە، لەنێویاندا یاریزانان، هونەرمەندانی راپ و سەرمایەداران کە خاوەنی سامانێکی زۆرن.
سەرچاوەیەکی دادوەری جەختی لەوە کردەوە کە کیلیان ئێمباپێ یەکێک بووە لە دیارترین ئامانجەکانی ناو لیستەکە، لەگەڵ یەکێک لە گۆرانیبێژانی راپ، جگە لە ژمارەیەک سەرمایەدار، لەوانە بازرگانێکی زێڕ و گەوهەر، بازرگانێکی گۆشتی تورکی، و سەرمایەدارێکی چینی، کە هەموویان خاوەن سامانی گەورەن.
لە کاتی لێکۆڵینەوەکاندا، تۆمەتبارەکە، کە لە یەکەم ساڵی بەرنامەی مەشقی پیشەیی چێشتلێنان خوێندنی جێهێشتبوو، گوتی کە هیوادارە خوێندنەکەی تەواو بکات و لە داهاتوودا وەک چێشتلێنەرێک کاربکات، سەرەڕای ئەو تۆمەتە مەترسیدارانەی ئاراستەی کراون.
ئاشکراکردنی پیلانەکە شۆکێکی گەورەی لە فەرەنسا دروستکرد، بەتایبەت کە لیستی ئامانجەکان ناوی کەسایەتییە دیارەکانی تێدابوو، کە لەسەرووی هەموویانەوە ئەستێرەی ریال مەدرید و کاپتنی هەڵبژاردەی کەڵەشێرەکان دێت.
