وەك بڵێی كەس تاقەتی لێدان لە هەورازی ئۆپۆزسیۆنی نەماوە، لە سێ حیزبەكەی ئۆپۆزسیۆنی جاران تەنیا یەكگرتووی ئیسلامی، لەسەر داوای ئەمیندارەكەی هەر لە سەرەتاوە خۆویستانە رێگای ئۆپۆزسیۆنیی هەڵبژارد، ئەویش ئۆپۆزسیۆنێكی ئیجابی كە بۆ ئیسلامییەكان ئەم ستایلە لە ئۆپۆزسیۆن پاساوی خۆی هەیە و دەكرێت لە وتارێكی دیكەدا باسی بكەین. لەپاڵ ئەمەشدا وادیارە نەوەی نوێش كێشەی لیدەری هەیە و پێناچێت شاسوار عەبدولواحید توانای ئەوەی هەبێت حیزبێكی راستەقینەی بەرفراوان بەڕێوەبەرێت و ئەم كارە بۆ ئەو گەنجە بزنسمانە، بێ ئەزموونی سیاسی و مێژوو، سەخت كەوتەوە، وەك بینیمان ئەوەی لە ماوەی چەند مانگێكدا بەدەستی هێنا، لەماوەی چەند هەفتەیەكدا دۆڕاندی و تۆپی تیپەكەی زۆر زوو تەقی. ئەزموونی زۆربەی گەنجەكانی تریش لە نەوەی دووەمی سیاسەت لە كوردستاندا هەروا كەوتەوە و وەك دەبینین زۆربەیان دووچاری شكستی جەماوەری و سیاسیی گەورە بوون و تەنیا چەند ساڵێك توانییان شۆی سیاسی بكەن و هەر زوو خانەنشین بوون. ئەم راكردنەی هێزە تەقلیدییەكان لە ئۆپۆزسیۆنبوون هەر پاساوێكی واقیعیشی هەبێت - كە هەیەتی- بەڵام دواجار بێ مەرام و پاڵنەری كەسی نییە و تێكەڵەیەكە لە بژارەی ناچاری و بەرژەوەندیی شەخسی و دەستكەوتی دارایی و دواجار "بە ئیسراحەت سیاسەتكردن" لە پەنای خێروبێری حكومەتدا. رێكنەخستنی دۆخی ئۆپۆزسیۆن بە یاسا و لە چوارچێوەی دەستوور یان عورفی سیاسیی كوردستاندا، یەكێك لەو هۆكارانەیە كە رێگای ئۆپۆزسیۆنی سەخت كردووە و كەس ناتوانێ تاسەر ئەو رێگایە تەواو بكات، ئەمەش وای كردووە هەمیشە هەمووان پەنا بۆ بەشداری لە حكومەتدا بەرن كە ئەمە لە هیچ كوێی دنیای دیموكراسیدا نەبووە و هەمیشە دەبێت بازنەیەك بۆ كاری ئۆپۆزسیۆن دروستبكرێت تا هێزەكان بتوانن لەوێدا كاری سیاسیی خۆیان وەك هێزگەلێكی ئۆپۆزسیۆنی راستەقینە ئەنجام بدەن. رێكخستنی دۆخی سیاسی و یاسایی ئۆپۆزسیۆن كاری حكومەتیش ئاسان دەكات، بەوپێیەی داخوازیی حیزبەكان بۆ بەشداری لە حكومەت كەمتر دەبێتەوە كاتێك زەمانەتی ئەوەیان وەرگرت كە لە دەرەوەی حكومەت ژیانی سیاسییان پارێزراو دەبێت. كاتێك هەرچی شیرینی و خەستاوی هەنگوینەكەیە لەناو حكومەتدا بێت و لە دەرەوەی حكومەت هێزەكان توانای هەناسەدانیان نەبێت و بە هەموو شێوەیەك دووچاری ئیقسا ببنەوە، ئەوكات هەمیشە ئەو حیزبانە یان دەبێت لە دۆخێكی شۆڕشگێڕانەدا بن –كە پێیان ناكرێت- یان دەبێت تا ئەوپەڕی هەوڵدان هەوڵی خۆخزاندنە ناو حكومەت بدەن، ئەمەش وادەكات هەمیشە ناڕِەزایەتی بكەوێتە ناو جەماوەر، بەمەش هێزی نوێ لەدایك ببێت، ئەمە ئەگەر بێت و تەقینەوەی جەماوەریی حساب بۆنەكراو روونەدات. ئێستا بۆشاییەكی گەورەی ئۆپۆزسیۆن لە دنیای سیاسیی هەرێمی كوردستاندا هەیە، پارتی و یەكێتی و گۆڕان بە ئاسانی دەسەڵات بەڕێوەدەبەن بێ هیچ سەرئێشەیەكی جددی. ئەوكاتەی لە 2014 بزووتنەوەی گۆڕان چووە حكومەتەوە، لە مەجلیسێكی كاك نەوشیرواندا بووم گوتی ئێمە كە لە دەرەوەی حكومەت بووین، ئۆپۆزسیۆنێكی جددی بووین، هەركەس پێی خوار دابنایە لێمان دەكردە هەڵا، دەبا ئێستەش كە ئێمە دەچینە حكومەتەوە خەڵكی تر ببنە ئۆپۆزسیۆنی جددی و كەی ئێمە پێمان خوار دانا لە ئێمەی بكەنە هەڵا. بەڵام ئەوەتا ئێستا دۆخی دەسەڵات تەواو ئارامە، ئەو بەدیلە جددیە هێشتا بەتەواوی دروست نەبووە، بەڵام هێشتاش گریمانەی ئەوە دەكرێت كە كۆمەڵگای كوردستان هێزی نوێی ئۆپۆزسیۆن بخاتەوە. ئێستا وا دەردەكەوێت ئیسلامییەكان خۆیان بۆ ئۆپۆزسیۆنێكی ئیجابیی نەرم ئامادە دەكەن، بەڵام تائێستا ئەم ئۆپۆزسیۆنە ئیسلامییەش سست و لاوازە، چ لەسەر ئاستی فراكسیۆنەكانیان لە بەغدا و فراكسیۆنەكانیان لە هەرێمی كوردستان و تەنانەت لەسەر ئاستی پارێزگاكانیش، هەروەها لەسەر ئاستی میدیایی و كاری جەماوەریش. یاسای هەڵبژاردنی پارێزگاكان لەم ماوەیەدا دوورخرایەوە بۆ كاتێكی نادیار بێ ئەوەی ئۆپۆزسیۆن قسەیەكی جددی بكات و وەك جاری جاران لە میدیاوە تەنگ بە دەسەڵات هەڵبچنێ، دۆخی كەركووك بەدەست پارتی و یەكێتییەوە گیرۆدەیە و ئەم ئۆپۆزسیۆنە هیچی بۆ ناكرێت، چونكە ستراتیژی نییە. بۆیە لەگەڵ بوونی ئیسلامییەكانیش لە دەرەوەی حكومەت و دەستهەڵبڕینیان وەك هێزی ئۆپۆزسیۆن، بەڵام هێشتاش بۆشایی ئۆپۆزسیۆن پڕنەبووەتەوە و ئەگەری ئەوە هەیە لەگەڵ تێپەڕبوونی كاتدا هێزی سیاسی و جەماوەریی دیكە لەدایك ببێت. بێگومان دەسەڵاتیش پێی خۆش نییە ئەو گۆڕەپانە هەستیارە بە تەنها لەلایەن ئیسلامییەكانەوە قۆرخ بكرێت. ئەم هێزە نوێیە ئەگەر لەدایك ببێت، پێموایە ماسییە چكۆلە پەرش و بڵاوەكانی نەوەی نوێ قووتدەدا، لەهەمانكاتیشدا دەبێت بە تەحەددایەك لەبەردەم تیۆریای "ئۆپۆزسیۆنی ئیجابی"ی سەڵاحەدین بەهائەدین، ئەمینداری گشتیی یەكگرتووی ئیسلامی. بۆ قسەكردن دەربارەی ئۆپۆزسیۆنی ئیجابیی ئیسلامییەكان پێویستمان بە وتارێكی دیكەیە.
.jpeg&w=3840&q=75)
.jpg&w=3840&q=75)
