رووداو - هەولێر
ئەمڕۆ چوارشەممە 15/4/2015 ، رێكخراوی دەوڵەتی ئیسلامی (ناسراو بە داعش) كوژرانی چەكدارێكی دیكەی كوردی خەڵکی باشووری كوردستانی نێو ریزەكانی راگەیاند.
رێكخراوی داعش لە رێگەی تۆڕە كەمەڵایەتییەكانەوە رایگەیاند:" گەنجێكی كورد بە ناوی (عەبدولقەهار عەبدولرەحمان خەلیفانی) كە خەڵكی شارەدێی خەلیفانی سەر بە شارۆچکەی سۆرانە، لە دوو رۆژی رابردوودا لە شەڕەكانی ناوچەی بێجی كوژراوە". رێكخراوەكە ئاماژەی بەوەش كردووە كە عەبدولقەهار لە ریزەكانی جوندولئیسلام بووە و پاشان بەیعەتی داوەتە ئەبوبەكر بەغدادی.
بەگوێرەی ئەو پۆستەی داعش، خەلیفانی تەمەنی 27 ساڵ بووە، لە 2001 ەوە پەیوەندی بە گرووپی جوندولئیسلام و پاشان ئەنسارولئیسلام كردووە ، لە ساڵی رابردوو پاش كۆنترۆڵكردنی شاری موسڵ لە لایەن رێكخراوی داعش، لەگەڵ كۆمەڵێك چەكداری دیكەی ئەنسارولئیسلام بەیعەتییان داوەتە ئەبوبەكر بەغدادی. لە شەڕی شارۆچکەی بێجیش كوژراوە.
هاوكات عەبدولقەهار عەبدولرەحمان، بەڕێوەبەری ئاسایشی خەلیفان بە تۆڕی میدیایی رووداوی گوت:" بەڵێ هەواڵەكە راستەو خەڵكی گوندی جونەرەیە". گوتیشی:" 10 خێزانی سنووری خەلیفان لەنێو داعشن".
