پەرلەمانتارێکی ئێران: ئەمریکا یاری دەکات و لە دانوستاندنەکان هیچمان دەستناکەوێت

ئەمڕۆ هەینی، 6ی شوباتی 2026، هاوکات لەگەڵ بەڕێوەچوونی گەڕی شەشەمی دانوستاندنەکانی نێوان ئێران و ئەمریکا لە عومان، ئیسماعیل کەوسەری، ئەندامی کۆمیسیۆنی ئاسایشی نیشتمانی و سیاسەتی دەرەوەی پەرلەمانی ئێران بە میدیای فەرمیی وڵاتەکەی راگەیاند: "دەبێت بە دەنگی بەرز بڵێین لە دانوستاندندا هیچمان دەست ناکەوێت، هۆکارەکەشی یاریکردنی ئەمریکایە لەگەڵمان."

بە گوتەی ئەو پەرلەمانتارە، ئەمریکییەکان لەژێر گوشاری ئیسرائیلییەکاندا جگە لە پرسی ئەتۆمی، دەیانەوێت پرسی مووشەکی و دۆسیە ناوچەییەکانیش تێکەڵ بە دانوستاندنەکان بکەن.

کەوسەری دەڵێت: "ئێمە تەنیا لەسەر پرسی ئەتۆمی دانوستاندن دەکەین، نەک شتی دیکە." ئاماژەی بەوەش کرد، پرسی مووشەکیی ئێران "هێڵی سوورە" و لایەنی بەرامبەر "بۆی نییە باس لەسەر مافی دروستکردنی مووشەکی ئێران بکات."

ئەو ئەندامەی پەرلەمانی ئێران بێمتمانەیی خۆی بە واشنتن نیشاندا و باسی لەوە کرد، لە رێککەوتنی ساڵی 2015 (بەرجام) ئێران پابەندی بەڵێنەکانی بوو، بەڵام ئەمریکییەکان پابەند نەبوون و گەمارۆکانیان لەسەر وڵاتەکە هەڵنەگرت.

لێدوانەکانی ئەو پەرلەمانتارە لەکاتێکدایە میدیای ئەمریکی بە جۆرێکی دیکە باس لە دانوستاندنەکانی ئەمڕۆ دەکات و بڵاویکردووەتەوە، شاندی ئەمریکا دەیەوێت جگە لە پرسی ئەتۆمی، دۆسیەکانی مافی مرۆڤ لە نێوخۆی ئێران، پرۆگرامە مووشەکییەکە و پرسی گرووپە چەکدارەکانی نزیک لە ئێران لە رۆژهەڵاتی ناوەڕاست بخاتە بەرباس.