رووداو دیجیتاڵ
ئەو هاوپەیمانییەی سعودیە سەرۆکایەتیی دەکات، رایگەیاند، رۆژی یەکشەممە 11ی تشرینی یەکەمی 2026 هێرشێکی نوێ کراوەتە سەر هۆڵی گەشتیاران لە فڕۆکەخانەی نێودەوڵەتیی ریاز، ئەمەش تەنیا رۆژێک دوای ئەوە دێت کە بەهۆی هێرشێکی مووشەکی بۆ سەر هەمان هۆڵ، 12 کەس کوژران.
چەکدارانی حووسی بەرپرسیارێتیی ئەم هێرشانەیان لە ئەستۆ گرت.
لە راگەیێندراوێکی سعودیەدا هاتووە کە ئەو 12 کەسەی لە هێرشەکەی رۆژی شەممەدا کوژراون بریتین لە: چوار هاووڵاتیی سعودی، دوو بەنگلادشی، فەلەستینییەک، ئەمریکییەک، میسرییەک، ئوردنییەک، سووریاییەک و سوودانییەک.
ئەو ڤیدیۆیانەی لە تۆڕە کۆمەڵایەتییەکان بڵاوبوونەتەوە، دەریدەخەن کە هۆڵی نێوەوەی فڕۆکەخانەکە زیانی گەورەی بەرکەوتووە و دووکەڵێکی زۆریش لە فڕۆکەخانەکەوە بەرزدەبێتەوە. لە هێرشەکەی رۆژی شەممەدا جگە لەو 12 کوژراوە، 300 کەسیش بریندار بوون کە تەندروستیی هەندێکیان سەختە.
ئەم هێرشە بە خوێناویترین هێرش لە وڵاتانی کەنداو دادەنرێت لەوەتەی جەنگی ئەمریکا و ئێران دەستیپێکردووە. تاوەکو رۆژی یەکشەممەش فڕۆکەخانەکە بە داخراوی مایەوە.
رۆژی یەکشەممە، چەند جارێکی دیکە فڕۆکەخانەی شا خالید لە ریاز بۆردوومان کرا و دەستەی فڕۆکەوانیی سڤیلی سعودیە رایگەیاند، چەند کەسێک بریندار بوون. پێش ئەوەش هاوپەیمانییەکەی سعودیە رایگەیاندبوو، مووشەکێکی کرووزیان لە نزیک ئاسمانی فڕۆکەخانەکە تێکشکاندووە.
ئەم هێرشە نوێیە کەمێک دوای ئەوە هات کە حووسییەکان رایانگەیاند، فڕۆکەخانەی سەنعای پایتەخت (کە لەژێر دەستی خۆیاندایە) جارێکی دیکە بۆردوومان کراوە و سعودیەیان بەم کارە تۆمەتبار کرد.
ئەم پەرەسەندنە خێرایەی شەڕەکە، مەترسیی ئەوەی لێدەکرێت کە ئەمریکا ناچار بکات راستەوخۆ بچێتە نێو جەنگەکەوە، وەک چۆن دۆناڵد ترەمپ، سەرۆکی ئەمریکا رایگەیاند کە بیر لەوە دەکاتەوە بەشداری لە شەڕی دژی حووسییەکان بکات. کۆشکی سپی تاوەکو رۆژی یەکشەممە هیچ لێدوانێکی نوێی لەم بارەیەوە نەداوە.
ئەم گرژییانە تەنیا کێشە نین بۆ خەڵکی سڤیل و گەشتە ئاسمانییەکان، بەڵکو مەترسییەکی گەورەن بۆ سەر دابینکردنی نەوتی جیهان و بەرزبوونەوەی نرخەکەی. هاوکات مەترسین بۆ سەر ئەو رێڕەوە دەریاییەی دەریای سوور کە وەک جێگرەوەی تەنگەی هورمز بەکاردەهێنرێت. بەو پێیەی تەنگەی هورمز بەهۆی جەنگی ئێرانەوە مەترسیی لەسەرە و هاتووچۆی تێدا کەمبووەتەوە.
