- - وڵاتانی ئەورووپی و عەرەبی بڕیارێکی ئیسرائیلیان بۆ دروستکردنی کۆمەڵگەیەکی نیشتەجێبوونی جووەکان لە رۆژهەڵاتی قودس/ئۆرشەلیم سەرکۆنە کرد.
- - وەزارەتی ئاوەدانکردنەوەی ئیسرائیل تەندەری بۆ زیاتر لە 1,200 خانوو لە ناوچەیەکی کێشەلەسەر راگەیاندووە.
- - بەریتانیا، فەرەنسا، ئیتاڵیا، ئەڵمانیا، میسر و ئوردن داوای هەڵوەشاندنەوەی دەستبەجێی پلانەکە دەکەن.
- - وەزیری دەرەوەی ئیسرائیل بەرگری لە بڕیارەکە کرد و بە "مافی مێژوویی گەلی جوو" ناوبی برد.
- - لە غەززە، دوای سێ ساڵ لە شەڕ، تەرمی 50 فەلەستینی لەژێر داروپەردوو دۆزرانەوە و بەخاکسپێردران.
رووداو دیجیتاڵ
چەندین وڵاتی ئەورووپی و عەرەبی بڕیارێکی نوێی ئیسرائیلیان سەرکۆنە کرد، کە دەیەوێ پڕۆژەیەکی گەورەی نیشتەجێبوون بۆ جووەکان لە رۆژهەڵاتی قودس/ئۆرشەلیم دروست بکات.
وەزارەتی ئاوەدانکردنەوە و نیشتەجێکردنی ئیسرائیل تەندەری بۆ دروستکردنی کۆمەڵگەیەکی گەورەی جوونشین راگەیاندووە کە بەگشتی زیاتر لە هەزار و 200 خانوو دەگرێتەوە لە ناوچەیەکی رۆژهەڵاتی قودس/ئۆرشەلیم. رەخنەگران دەڵێن، ئەگەر ئەم پرۆژەیە جێبەجێ بکرێ، کەرتی رۆژئاوا دوو پەرت دەبێ و دروستبوونی دەوڵەتی فەلەستینیی یەکگرتوو ئەستەم دەبێ.
کاردانەوە نێودەوڵەتییەکان و هەڵوێستی وڵاتان
ئێد میلیباند، وەزیری دەرەوەی بەریتانیا بڵاوکردنەوەی ئەو تەندەرەی بە "کردەوەیەکی قبووڵنەکراو و وێرانکەر" ناوبرد و سەرکۆنەی "تووندوتیژیی و تیرۆری جوو"ەکانی کرد. میلیباند لە راگەیێندراوێکدا گوتی، حکومەتی بەریتانیا "داوای هەڵوەشاندنەوەی دەستبەجێی ئەو بڕیارە دەکات" و باڵیۆزی ئیسرائیلیشی بۆ سەرزەنشتکردن بانگهێشت کرد.
لە راگەییندراوێکی دیکەی هاوبەشدا بەریتانیا، فەرەنسا، ئیتاڵیا و ئەڵمانیا سەرکۆنەی بڕیارەکەی ئیسرائیلیان کرد و رایانگەیاند: "لەبەر ئەوەی ئەم بڕیارە لە کاتێکدا دەرکراوە کە ناسەقامگیریی مەترسیداری لە کەرتی رۆژئاوا هەیە و جووەکان تووندوتیژیی بێ پێشینە بەرامبەر خەڵکی سڤیل دەکەن و کۆتوبەندی جیدی خراوەتە سەر ئابووریی فەلەستین، هێندەی دیکە جێگەی نیگەرانییە."
چوار وڵاتە ئەورووپییەکە داوا لە ئیسرائیل دەکەن "دەستبەجێ لە پلانەکەی پاشگەز بێتەوە و فراوانکردنی کۆمەڵگەکانی لە کەرتی رۆژئاوا بووەستێنێت." هەروەها میسر و ئوردنیش بەتووندی رەخنەیان لەم هەنگاوەی ئیسرائیل گرت.
وەڵامی ئیسرائیل بۆ رەخنەکان
لە وەڵامدا، جەدعون ساعر، وەزیری دەرەوەی ئیسرائیل رۆژی پێنجشەممە بەرگری لە بڕیارەکە کرد و گوتی، ئەوە "مافی مێژوویی گەلی جووە بۆ دامەزراندنەوەی نیشتمانەکەی لە خاکی ئیسرائیل — لەنێویاندا ئەو ناوچەیەی کێشەی لەسەرە."
ساعر رەخنەی لە حکومەتی بەریتانیا گرت کە "تەنیا لۆمەی ئیسرائیل دەکات و چاوپۆشی لە تووندڕەویی فەلەستینییەکان دەکات."
بەخاکسپاردنی 50 تەرم دوای سێ ساڵ لە غەززە
لە شاری غەززە، رێوڕەسمێکی گەورەی بەخاکسپاردن بۆ تەرمی 50 فەلەستینی بەڕێوەچوو. ئەم کەسانە لە سەرەتای شەڕی ئیسرائیل و حەماس لە تشرینی دووەم و کانوونی یەکەمی 2023 کوژرابوون، بەڵام تازە تەرمەکانیان لەژێر داروپەردووی باڵەخانە رووخاوەکاندا دۆزراوەتەوە.
دەیان کەس تەرمەکانیان کە بە ئاڵای فەلەستینەوە پێچرابووەوە، بە شەقامە وێرانکراوەکاندا برد بۆ گۆڕستان، هەندێکیشیان وێنەی کوژراوەکانیان بەدەستەوە بوو.
لیان کەرەم، کە باوکی و ئەندامانی دیکەی خێزانەکەی لەدەستداوە، گوتی: "توانیمان دوای سێ ساڵ لە شەڕ، دوای سێ ساڵ لە ئازار و ئەشکەنجە دەریانبهێنینەوە. توانیمان دەریانبهێنین و بە شکۆمەندییەوە لە شوێنی کۆتاییان بەخاک بیانسپێرین. توانیمان نوێژیان لەسەر بکەین و بەخاکیان بسپێرین."
بەپێی ئامارەکانی وەزارەتی تەندروستیی غەززە، لە ماوەی ئەم سێ ساڵەی شەڕدا زیاتر لە 73 هەزار و 400 فەلەستینی کوژراون. وەزارەتەکە کە پێشتر بەشێک بوو لە حکومەتەکەی حەماس تۆمارێکی وردی هەیە کە ئاژانسەکانی نەتەوە یەکگرتووەکان و رێکخراوە نێودەوڵەتییەکان بە باوەڕپێکراوی دەزانن.