رووداو دیجیتاڵ عەباس عێراقچی لە کاردانەوەیەکدا بەرامبەر (رێککەوتنی مەککە) پەیامێکی ئاراستەی وڵاتانی دراوسێی ئێران کرد و رایگەیاند، "کاتی ئەوە هاتووە تەنیا پشت بە خۆمان ببەستین و رێبازی برایەتیی راستەقینە بگرینەبەر". عەباس عێراقچی، وەزیری دەرەوەی ئێران، رۆژی هەینی، 7ـی ئابی 2026، لە تۆڕی کۆمەڵایەتیی ئێکس باسی لە جەنگی چەند مانگی رابردووی سوپای وڵاتەکەی لەگەڵ ئەمریکا و ئیسرائیل کرد و نووسی، "هێزە چەکدارە بەهێزەکانی ئێران ئامادەیی، توانا و دەسەڵاتی خۆیان لە بەرامبەر پێشکەوتووترین هێزی سەربازیی جیهاندا سەلماندووە." دواتر وەزیری دەرەوەی ئێران باسی لە رێککەوتنی ئەمڕۆی مەککە کرد و گوتی، "کاتێک موسڵمانان لە تەنیشت یەکدی یەکگرتوو دەبن، دەتوانن بەهێز و راشکاوانە لە بەرامبەر هەر ئاڵنگارییەک بووەستنەوە کە لەلایەن بێگانە نەیارەکانەوە دروستدەکرێت." عەباس عێراقچی لە کۆتایی پەیامەکەیدا دەڵێت، "کاتی ئەوە هاتووە تەنیا پشت بە خۆمان ببەستین و رێبازی برایەتیی راستەقینە بگرینەبەر." ئەم پەیامەی عەباس عێراقچی لەکاتێکدایە، ئەمڕۆ هەینی سعوودیە، پاکستان و تورکیا لە شاری مەککە، رێککەوتننامەیەکی بەرگریی هاوبەشیان واژۆکرد. بەپێی رێککەوتننامەکە، هەر هێرشێکی سەربازیی بۆ سەر هەر یەکێک لەم سێ وڵاتە، وەک هێرش بۆ سەر هەموویان سەیردەکرێت.
ئێران07-08-2026پەرلەمانتارێکی ئێران: تاوەکو ئەمریکا لە کاری تێکدەرانە بەردەوام بێ تەنگەی هورمز ناکرێتەوە
.webp&w=3840&q=75)
