سەرۆک بارزانی: پەیوەندیمان لەگەڵ بەغدا باشە و تەنیا داوای جێبەجێکردنی دەستوور دەکەین

رووداو دیجیتاڵ

ڕۆژی یەکشەممە، 4ی ئۆکتۆبەری 2026، لە رێوڕەسمی کۆتاییهاتنی خولی بیستەمی پەیمانگەی کادیرانی پارتی دیموکراتی کوردستان، سەرۆک بارزانی گوتارێکی پێشکەش کرد و گوتی، ئێستا پەیوەندیی هەرێمی کوردستان لەگەڵ حکومەتی فیدراڵی عێراق باشە و " تەنیا داوای جێبەجێکردنی دەستوور دەکەین."

هەروەها ئاماژەی بە ڕێککەوتنی نێوان نێچیرڤان بارزانی، سەرۆکی هەرێمی کوردستان و هادی عامری کرد و گوتی "ئەگەر ئەم ڕێککەوتنە جێبەجێ بکرێت باشە، بەڵام ئەگەر جێبەجێی نەکەن، بیر لەوە دەکەینەوە هەڵوێستی ئێمە چۆن دەبێت."

سەرۆک بارزانی لە گوتارەکەیدا ئاماژەی بەوەکرد دۆخی ناوچەکە زۆر هەستیارە و کەس نازانێت بەره‌و کوێ دەچێت، گوتیشی  لەو شەڕە گەورەیەی ماوەی رابردوو " توانیمان هەرێمی کوردستان و خەڵکەکەی تا ئاستێکی زۆر لە بەڵایەکی زۆر گەورە بپارێزین."

سەرۆک بارزانی جەختی لەوە کردەوە "حەز دەکەین باشترین پەیوەندیمان هەبێت؛ نە لەگەڵ ئێران و نە لەگەڵ تورکیا و هیچ دەوڵەتێکی تر دوژمن نین." هیواشی خواست شەڕ لە ناوچەکەدا کۆتایی بێت و ئاشتی جێگیر بێت.

نوێدەکرێتەوە...

.