.webp&w=3840&q=75)
رووداو دیجیتاڵ
شاندێکی دەزگای شەهیدانی عێراق سەردانی وەزارەتی کاروباری شەهیدان و ئەنفالکراوانی هەرێمی کوردستانی دەکات. بەڕێوەبەری گشتیی خزمەتگوزاریی کاروباری زیندانییانی سیاسی لە وەزارەت دەڵێت، ئامانجی سەردانەکە ئامادەکردنی رەشنووسێکی رێککەوتنە بۆ هاوئاهنگی زیاتر لەنێوان هەردوولا، بە مەبەستی راییکردنی کاروباری کەسوکاری شەهیدان و زیندانیانی سیاسی لە بەغدا.
رۆژی پێنجشەممە، 13ـی ئابی 2026، ئەحمەد مام رەسووڵ، بەڕێوەبەری گشتیی خزمەتگوزاریی کاروباری زیندانییانی سیاسی لە وەزارەتی کاروباری شەهیدان و ئەنفالکراوان بە تۆڕی میدیایی رووداو رایگەیاند: "ئەمڕۆ شاندێک لە دەزگای شەهیدانی عێراقەوە سەردانی وەزارەتمان دەکەن بە مەبەستی رێکخستن و ئامادەکارییەکانی هاوئاهەنگیی نێوان دەزگای شەهیدانی عێراق و وەزارەتی کاروباری شەهیدان".
لەبارەی ئامانجی سەردانەکە ئەحمەد مام رەسووڵ گوتی: "بۆ ئەوەیە لە بەغدا یارمەتیی کەسوکاری شەهیدان و زیندانیانی سیاسی بدرێت لە راییکردنی کارەکانیان. بۆ نموونە ئەو کەسانەی کە ئیشی خوێندن، پشتگیری یان هەر کارێکی دیکەی کارگێڕییان لە بەغدا هەبێت، هاوئاهەنگییان بۆ دەکرێت و یارمەتی دەدرێن. هەر بۆ ئەم مەبەستەش رەشنووسێک لەنێوانمان ئامادە دەکرێت تاوەکو لە بەغدا واژۆ بکرێت."
ئەم هەنگاوە لە چوارچێوەی هەوڵەکانی وەزارەتی کاروباری شەهیدان و ئەنفالکراوانە بۆ کەمکردنەوەی رۆتین و ئاسانکاری بۆ ئەو خێزانانەی کە پێویستیان بە سەردانیکردنی دامەزراوە فیدراڵییەکان هەیە لە بەغدا. بە گوتەی ئەحمەد مام رەسووڵ، ساڵانە ئەم هاوئاهەنگییە دەکرێت، تاوەکو لەم رێیەوە کارەکانی کەسوکاری شەهیدان بە خێرایی بکرێن.
