لە کەلەکچی بەهۆی لێچوونی گازەوە ماڵێک ئاگری گرت و چوار کەس بریندار بوون

رووداو دیجیتاڵ

بەهۆی لێچوونی گاز و کەوتنەوەی ئاگر، چوار هاونیشتمانی لە ناحیەی کەلەکچی لە سنووری پارێزگای دهۆک بریندار بوون. 

هەڤاڵ محەممەد، بەڕێوەبەری ناحیەی کەلەکچی، ئەمڕۆ 04ـی ئابی 2026 بە تۆڕی میدیایی رووداوی گوت: "دوو لە بریندارانی رووداوەکەدا برینیان سووکە و دووانەکەی دیکە قورسترن".

سەبارەت بە هۆکاری رووداوەکە، بەڕێوەبەری ناحیەی کەلەکچی گوتی، بوتڵی گاز لێچوونی هەبووە و پێیان نەزانیوە، ئاگریان کردووەتەوە، یەکسەر کڵپەی کردووە.

دوو لە بریندارەکان رەوانەی فریاکەوتنی دهۆک کراون و دووانەکەی دیکەش هەر لە کەلەکچی چارەسەری پزیشکی وەردەگرن.

پەڕاوی لێکۆڵینەوە بۆ رووداوەکە کراوەتەوە. هەڤاڵ محەممەد دەڵێت، "تاوانکاری نەبووە و رووداوێکی ئاسایی بووە".