رووداو دیجیتاڵ
چەکدارانی ئۆپۆزیسیۆنی حکومەتی سووریا لە عەفرین تەقە لە دوو هاونیشتمانی دەکەن و برینداریان دەکەن. یەکێکیان بەهۆی سەختی برینەکەی لە نەخۆشخانە گیانی لەدەستدا.
بەرەبەیانی رۆژی سێشەممە 18-6-2024، چەکدارانی گرووپی حەمزات کە گرووپێکی ئۆپۆزیسیۆنی سووریان و حکومەتی تورکیا پاڵپشتییان دەکات، تەقەیان لە دوو هاونیشتمانی کرد و هەردووکیان بریندار کردن. جەمال گولین بەکر کە تەمەنی 26 ساڵ و باوکی دوو منداڵ بوو، بەیانی ئەمڕۆ بەهۆی سەختی برینەکەیەوە گیانی لەدەستدا.
رۆژی هەینی 21ـی حوزەیرانی 2024، عەبدولڕەحمان گولین، برای کوژراوەکە میوانی بوولتەنی کاژێر 19:00ی تایبەت بە رۆژئاوای کوردستان و سووریای تۆڕی میدیایی رووداو بوو و گوتی: "براکەم بە ماتۆڕ لە کار گەڕاوەتەوە بۆ ماڵ و لە رێگە گرووپە چەکدارەکان ویستوویانە ماتۆڕەکەی لێ بستێنن، ئەویش هەڵهاتووە و لە پشتەوە تەقەیان لێکردووە و گوللەیەک بەر پشتی کەوتووە و دواتر لە نەخۆشخانە گیانی لەدەستدا".
عەبدولڕەحمان گولین گوتی:"براکەم هاوڕێیەکی دیکەشی لەگەڵ بوو بە ناوی محەممەد عەلی کە دراوسێی خۆیانە لە گوندی دارگر؛ گوللەیەک بەر قاچی ئەویش کەوتووە و ئێستا تەندروستی ناجێگیرە".
بە گوتەی عەبدولڕەحمان گولین، کەسێکی خەڵکی گوندی دارگر بەناوی بەکر عەدنان رووداوەکەی بینیوە و ئاماژەی بەوەشکرد: "ئێوارەی ئەو رۆژە چەکدارەکان بەسەر گوندەکەیان داداوە و ئەو هاونیشتمانییەیان گرتووە و تاوەکو ئێستا چارەنووسی نادیارە".
هاوکات ئەحمەد حەسەن، ئەندامی سەرکردایەتیی ئەنەکەسە لە عەفرین هەر ئەمڕۆ بە رووداوی راگەیاند، رووداوەکە رۆژی 18ی ئەم مانگە روویدا، ئەوەش کاتێک جەمال و محەممەد بۆ گوندی دارگر دەگەڕانەوە و لە نزیک گوندەکەیان گرووپێکی چەکدار تەقەی لێکردن.
ئەو ئەندامەی سەرکردایەتیی ئەنەکەسە لەبارەی ناسنامەی ئەو گرووپە چەکدارەوە گوتی: "ئەو چەکدارانەی لە دەوروبەری گوندی دارگرن، سەرجەمیان سەر بە گرووپی حەمزاتن".
ئێوارەی ئەمڕۆ هاونیشتمانییانی عەفرین تەرمی جەمال گولینیان لە گوندی دارگر بەخاکسپارد و ئەحمەد حەسەن گوتی: "تەرمی جەمال بە ئاڵای کوردستان پێچرابوو و وێنەی سەرۆک مەسعوود بارزانیشیان لەسەر تابوتەکەی دابوو و بە دروشمی شەهید نامرێ بەخاکیان سپارد".
ئەحمەد حەسەن پێیوایە کۆتاییهێنان بەو دۆخەی عەفرین تێیکەوتووە، پێویستی بە چارەسەری نێودەوڵەتی هەیە و ئاماژەی بەوەشکرد: "ناکرێ لە شوێنێک گرووپێک هەبن کە خەڵک بکوژن و هەر خۆشیان دادگە بەڕێوەببەن. تاوەکو ئەم دۆخە چارەسەر نەکرێت، دەبێ بەردەوام چاوەڕوانی رووداوی لەم شێوەیە بین".
