رووداو دیجیتاڵ
بەڕێوەبەری گشتیی کشتوکاڵی پارێزگای ورمێ دەڵێت، لافاو زیانی بە 700 هێکتار زەویی کشتوکاڵیی سەڵماس گەیاندووە؛ ئاماژە بەوەش دەکات، بەرهەمی 10 هێکتار باخیش تووشی زیان بوون.
ئەمڕۆ شەممە 24-10-2026، محەممەدڕەزا ئەسغەری، بەڕێوەبەری گشتیی کشتوکاڵی پارێزگای ورمێی رۆژهەڵاتی کوردستان رایگەیاند، بەدواداچوونی ورد بۆ زیانی باخداران و جووتیاران دەکرێ کە بەهۆی لافاوەکەی رۆژی پێنجشەممە تووشی بوون.
بەگوتەی محەممەدڕەزا ئەسغەری، خەمڵاندنە سەرەتاییەکان دەرخەری ئەوەن، بەهۆی لافاوەکەوە لانیکەم زیان بەر 700 هێکتار زەویی کشتوکاڵی کەوتووە.
هاوکات بەڕێوەبەری گشتیی کشتوکاڵی ورمێ ئاماژەی بەوەش کرد، هەر بەهۆی لافاوەکەوە، بەرهەمی نزیکەی 10 هێکتار باخیش تووشی زیان بوون.
هەرچی زیانەکانی تایبەت بە ئاژەڵانە، وەک ئەسغەری دەڵێت، لە لافاوەکەدا مانگایەکی و مەڕێکیش مردار بوون.
رۆژی 22-10-2026، لە ئەنجامی بارینی باران و تەزرەی بەخوڕ لە سنووری شاری سەڵماسی پارێزگاکە لافاو دروستبوو و لە ئەنجامدا منداڵێک و دوو پیاو گیانیان لەدەستدا و چەند کەسی دیکەش بریندار بوون.
