رووداو دیجیتاڵ
کۆتایی ئەم هەفتەیە لیستی مووچەی مانگی ئەیلوولی مووچۆرانی هەرێمی کوردستان ئامادە دەبێت و پێشبینی دەکرێت سەرەتای هەفتەی داهاتوو رادەستی وەزارەتی دارایی عێراق بکرێت.
سەرچاوەیەکی بەرپرس لە حکومەتی هەرێمی کوردستان بە تۆڕی میدیایی رووداوی راگەیاند: دواکەوتنی ناردنی لیستی مووچەی مانگى ئەیلوولى فەرمانبەرانی هەرێمی کوردستان بۆ بەغدا پەیوەندیدارە بە دوو هۆکارەوە کە ئێستا کاریان لەسەر دەکەن.
بە گوتەی ئەو سەرچاوەیە یەکێک لە هۆکارەکان نوێکردنەوەی سیستەمی پەیڕۆڵە کە تایبەتە بە لیستی مووچەوە، ئەوی دیکە هەندێک داواکاری بەغدا بووە کە پەیوەندیدارە بە ژمارەی وەزیفی فەرمانبەرانی هەرێمی کوردستان.
لە 23ی ئەیلوولەوە وەزارەتی دارایی عێراق دەستی بە دابەشکردنی مووچەی فەرمانبەرانی خۆی کردووە، کە بەراورد بە مانگەکانی ئاب و تەممووز دابەشکردنى مووچە پێشکەوتووە.
سەرچاوەکەی رووداو پێشبینی دەکات تاوەکو کۆتایی ئەم هەفتەیە لیستی مووچە ئامادە بێت، بەڵام بەهۆی ئەوەی رۆژانی 30ى ئەیلوول و یەکى تشرینی یەکەم لە عێراق پشووە، ئەگەر هەیە سەرەتای هەفتەی داهاتوو لیستی مووچە رادەستی وەزارەتی دارایی عێراق بکرێت.
هەرێمی کوردستان مانگانە پێویستی بە زیاتر لە 900 ملیار دینارە بۆ مووچە، بەڵام لە ماوەی دوو مانگی رابردوودا وەزارەتی دارایی فیدراڵی 120 ملیار دیناری لەو پارەیە بڕیوە کە بۆ مووچە دەنێردرێت بە پاساوی ئەوەی داهاتی نانەوتی رادەست نەکراوە.
سەلوان ئاکرەیی، ئەندامی پەرلەمانی عێراق بە تۆڕی میدیایی رووداوی راگەیاند، پێشبینی دەکرێت ئەم مانگە زووتر لە مانگەکانی دیکە مووچەی فەرمانبەرانی هەرێمی کوردستان بنێردرێت.
