رووداو دیجیتاڵ
یەکێتی و نەوەی نوێ لە راگەیێندراوێکی هاوبەشدا لەبارەی پێکهێنانی کابینەی نوێی حکومەتی هەرێمی کوردستان دەڵێن: "هەردوو لایەن ئامادەییان دەربڕی بۆ پێکهێنانی کابینەی نوێی حکومەتی هەرێمی کوردستان لەسەر بنەمای ئیستحقاقی هەڵبژاردن، کە حکومەتێکی هاوسەنگ و پەسەندکراو بێت لەلایەن خەڵکی هەرێمی کوردستان."
ئەمڕۆ چوارشەممە، یەکێتیی نیشتمانیی کوردستان و جووڵانەوەی نەوەی نوێ لە سلێمانی کۆبوونەوە. هەردوو حیزبەکە دوای کۆبوونەوە راگەیێندراوێکی هاوبەشیان بڵاوکردەوە.
یەکێتی و نەوەی نوێ لە راگەیێندراوە هاوبەشەکەدا لەبارەی پێکهێنانی حکومەت دەڵێن: "هەردوو لایەن ئامادەییان دەربڕی بۆ پێکهێنانی کابینەی نوێی حکومەتی هەرێمی کوردستان لەسەر بنەمای ئیستحقاقی هەڵبژاردن، حکومەتێکی هاوسەنگ و پەسەندکراو بێت لەلایەن خەڵکی هەرێمی کوردستان، عێراق و کۆمەڵگەی نێودەوڵەتیەوە، هەروەها حکومەتێک بێت کە چارەسەری بنەڕەتی بۆ کێشەکانی نێوان هەرێمی کوردستان و عێراق پێبێت".
یەکێتی و نەوەی نوێ دەڵێن: "هەموو لایەک ئاگادار دەکەینەوە، پێکنەهێنانی حکومەت پەیوەستە بە ژیان و گوزەران و داهاتووی هەرێمی کوردستانەوە، بۆیە هەر لایەنێک ببێتە هۆکاری بەربەستی پێکنەهێنانی حکومەت، ئەوا بەرپرس دەبێت بەرامبەر بە خەڵکی هەرێمی کوردستان، و هەر شتێک کە لە داهاتوودا روودەدات".
لە راگەیێندراوەکەدا هاتووە، لە کۆبوونەوەکە جەخت لەوە کراوەتەوە، "بۆ کۆتاییهێنان بەم دۆخە نەخوازراوەی ئێستا و بەدیهێنانی خۆشگوزەرانی بۆ خەڵکی کوردستان هەموو رێگەیەکی چارەسەر دەگرینە بەر."
یەکێتی و نەوەی نوێ ئاماژە بەوە دەدەن "وەک هەمیشە دەرگای گفتوگۆی ئەم هاوپەیمانێتییەمان کراوەیە بەڕووی هەموو لایەک، ئەویش لەسەر بنەمای ئەو واقیعە نوێیەی لە هەرێمی کوردستان هاتووەتە ئاراوە".
