رووداو دیجیتاڵ
هەردوو کۆمەڵەی زەحمەتکێشانی کوردستان و کۆمەڵەی شۆڕشگێڕی زەحمەتکێشانی کوردستانی ئێران رایدەگەیێنن، کەمپەکانیان لە ناحیەی سوورداش لە پارێزگای سلێمانی بە درۆن هێرشیان کراوەتەسەر.
ئەمجەد حوسێن پەناهی، ئەندامی سەرکردایەتیی کۆمەڵەی زەحمەتکێشانی کوردستان، ئەمڕۆ دووشەممە 7ی ئەیلوول بە تۆڕی میدیایی رووداوی گوت: "لە ئەنجامی بۆردوومانەکە چەند بارەگایەکمان سووتان، بەڵام زیانی گیانیمان نەبووە."
هێرشەکە نزیک کاژێر 04:40ی بەیانیی ئەمڕۆ دووشەممە بووە و لە رێگەی سێ درۆنەوە کراوە. حیزبەکانی رۆژهەڵاتی کوردستان دەڵێن: "هێرشەکە لەلایەن کۆماری ئیسلامیی ئێرانەوە کراوە."
هاوکات عەلی رەنجبەری، بەرپرسی پەیوەندییەکانی کۆمەڵەی زەحمەتکێشانی کوردستانی ئێران ئەمڕۆ دووشەممە بە رووداوی راگەیاند: "زیانی گیانیمان نەبووە و بنەماڵە و هاوڕێیانمان سەلامەتن، بەڵام زیانی مادی هەیە."
بەگوێرەی ئەو دیمەنانەی بۆ رووداو نێردراون، لە ئەنجامی هێرشەکە لە چەند خانوویەکی کەمپەکە ئاگر کەوتووەتەوە و کەرەستەکانیان بە تەواوی سووتاون.
عەلی رەنجبەری ئاماژەی بەوەکرد: "ئەو جێگەیەی بۆردوومان کراوە، جگە لە ژن و منداڵ و خەڵکی سڤیل، هیچ بنکەیەکی سەربازی و حیزبیی تێدا نییە".
دەزگای ئاسایشی هەرێمی کوردستان لە راگەیێندراوێکدا رایگەیاند، هێرشەکان بە سێ درۆن کراون و زیانی گیانییان نەبووە.
بەگوێرەی بەدواداچوونی تۆڕی میدیایی رووداو، لە 28ی شوباتی ئەم ساڵەوە هەرێمی کوردستان بە زیاتر لە 980 درۆن و مووشەک هێرشی کراوەتەسەر.
