رووداو دیجیتاڵ
بەرەبەیانی رۆژی هەینی هێرشکرایە سەر هەولێر، دژە تیرۆری کوردستان دەڵێت، بە سێ درۆن بووە و زیانی مادی نەبووە. هاوکات لە چەمچەماڵیش ژمارەیەک هاونیشتمانی لە بە رووداویان گوت: "هەستیان بە بوومەلەرزەیەکی بەهێز کردووە."
دژە تیرۆری کوردستان لەبارەی کاتی هێرشەکەی سەر هەولێرەوە لە راگەیێندراوێکدا رایگەیاندووە: "کاژێر 02:17 خولەکی بەرەبەیانی رۆژی هەینی، 14ـی ئابی 2026 بە سێ درۆن هێرشەکە کراوە، بەڵام لەلایەن هاوپەیمانانەوە سەرجەمیان تێکشێندراون."
هاونیشتمانییان ڤیدیۆ و وێنەی ساتی هێرشەکانی سەر هەولێریان بۆ رووداو نارد، دەرکەوتووە کە لە نزیک پڕۆژەیەکی نیشتەجێبوون پاشماوەی درۆنەکە کەوتووەتەخوارەوە، هیچ زیانێکی نەبووە.
"بوومەلەرزەیەکی بەهێز لە چەمچەماڵ"
هەواڵی هێرشەکانی سەر هەولێر گەرم بوون، ژمارەیەک هاونیشتمانی پەیوەندییان بە رووداو کرد و گوتیان کە هەستیان بە "بوومەلەرزەیەکی بەهێز" کردووە لە چەمچەماڵ، بەڵام هیچ لایەنێکی فەرمی و ئاژانسەکانی بوومەلەرزەزانی پشتڕاستیان نەکردووەتەوە کە بوومەلەرزە روویدابێت.
ئەو هاونیشتمانییانە ڤیدیۆی کامێرای چاودێریی ساتی "بوومەلەرزەکەیان" بۆ رووداو ناردووە و تەنانەت هاونیشتمانییەک لە سنووری ناحیەی شۆڕشی چەمچەماڵ لە یەکێک لە ڤیدیۆکان باس لەوە دەکات کە دیواری ماڵەکەی رووخاوە "بەهۆی بوومەلەرزەکەوە."
