لە کەرکووک پارتی پێشنیازێکی داوەتە حیزبە کوردستانییەکان و ئەوانیش قبووڵیان کردووە

رووداو دیجیتاڵ

حیزبە کوردستانییەکان لە کەرکووک کۆبوونەوە، بەرپرسی لقی سێی پارتی لەو شارە دەڵێت، یەکێتی ئامانجی کاری هاوبەشە لەگەڵ ئێمە. بەرپرسی مەڵبەندی یەکێتیش دەڵێت، پارتی پێشنیازی کۆبوونەوەی کرد و ئێمەش قبووڵمان کرد. بەرپرسی مەڵبەندی حیزبی شیوعی گوتی: "پارتی و یەکێتی جیاواز لە جاران، لێک نزیک بوون."

کۆبوونەوەکە، ئەمڕۆ چوارشەممە، لە بارەگای لقی سێی پارتی دیموکراتی کوردستان لە کەرکووک بەڕێوەچوو و تێیدا کەسی یەکەمی حیزبە کوردستانییەکان لەو شارە بەشدار بوون.

پارتی: رەنگە یەکێتی ئامانجی کاری هاوبەش بێت

سیروان سەید عاسی، بەرپرسی لقی سێی کەرکووکی پارتی بە تۆڕی میدیایی رووداوی راگەیاند، کۆبوونەوەیەکی زۆرباشمان کرد و پەیوەندییەکانیشمان زۆر باش بوون، حیزبەکان هەموویان زۆریان پێخۆشە پێکەوە کار بکەین.

لەبارەی یەکێتیی نیشتمانیی کوردستانیشەوە، سیروان سەید عاسی گوتی: "رەنگە ئامانجی کاری هاوبەش بێت لەگەڵ ئێمە."

ئەو بەرپرسەی پارتی ئاماژەی بە دۆخی کەرکووک کرد و گوتی: "بابەتی کەرکووک بە کۆبوونەوەیەک و دووان یەکلایی نابێتەوە، دەبێ کاری بۆ بکرێت و هەموو حیزبەکانیش داوای چارەسەریان کردووە."

سیروان سەید عاسی ئاماژەی بەوەکرد، یەکێتی سەردانی کردوون و پێی خۆش بووە کۆببنەوە.

یەکێتی: پارتی پێشنیازی کۆبوونەوەی کرد و ئێمەش قبووڵمان کرد

هاوکات رەوەند مەلا مەحموود، لێپرسراوی مەڵبەندی یەکێتی لە کەرکووک بە رووداوی راگەیاند، "کە بەرپرسی نوێی لقی پارتی لە کەرکووک دیاریکرا، بۆ بەخێرهاتن سەردانم کرد و ئەویش پێشنیازی کۆبوونەوەی کرد و ئێمەش قبووڵمان کرد."

لێپرسراوی مەڵبەندی یەکێتی لە کەرکووک ئاماژەی بەوەکرد، دەبێ ئێمە (حیزبە کوردستانییەکان لە کەرکووک) زوو زوو کۆببینەوە، "چونکە مامەڵەی ئێمە جیاوازە و لەگەڵ حکومەتی بەغدایە، دەبێ هەڵوێستمان جیاواز بێت و هاوئاهەنگ بین."

لەبارەی پەیوەندییەکانیشیان لەگەڵ پارتی گوتی: "ئێمە هەوڵمان داوە لێرە (کەرکووک) پەیوەندییەکانمان ئاسایی بێت و کێشەی هەرێمی کوردستان کاریگەریی لەسەری نەبێ."

کۆنووسی کۆبوونەوەی حیزبەکان

 لە کۆبوونەوەی حیزبە کوردستانییەکانی کەرکووک دا، چەندین پرسی سیاسی تاوتوێ کران و پاش گفتوگۆیەکی هەمەلایەنەی لایەنەکانی بەشداربووی کۆبوونەوە، لەسەر ئەم خاڵانەی خوارەوە هاوڕاو هاوهەڵوێست بوون: 

یەکەم: ئەم کۆبوونەوانە وە لەکاتی پێویست بکرێن، کە هەر جارە و لە بارەگای لایەنێکی سیاسی کوردی پارێزگاکەدا بێت.

دووەم: جەختکردنەوە لەسەر هاودەنگی لایەنەکان بەرانبەر مافە رەواکانی کورد.

سێیەم: هەوڵی جیدی بدرێت لەپێناو بەدەستهێنانەوەی ئەو پلەو پۆستانەی پشکی کورد بوون لە رابردوودا لە ئیدارەی خۆجێی پارێزگاکە کە لەدەست دراون. هەڵبەت ئەم هەوڵەش بەبێ یەکدەنگی و هاوهەڵوێستی حیزبە کوردستانییەکان نایەتەدی.

چوارەم: خواستی جەماوەری کەرکووک، پاراستن و پەرەپێدانی گیانی یەکڕیزی و تەبایی لایەنە سیاسییەکانی شارەکەیە، بۆیە پێویستە ئەم خواستە رێزی لێبگیرێت و بەهەند وەربگیرێت.

پێنجەم: هەرگیز بیر لەوە نەکرێتەوە کە لە پێناو پۆستێکی ئیداری یاخود بەرژەوەندیی بەرتەسکی حیزبیانە، ماڵی کورد پەرتەوازە بکەین کە دەرئەنجام لێکترازانی لایەنەکانی لێبکەوێتەوە، بەمەش هەم پۆستەکە لەدەست دەدەین و هەمیش جەماوەر و لایەنگرانمان نیگەران دەکەین.

شەشەم: دەنگی ئێمەی پێکهاتەی کورد لە شارەکە زۆرینەیە و پێویستە رێز لە سەنگی خۆمان و دەنگدەرانمان بگرین و نابێت هیچ جۆرە رێککەوتنێک لەگەڵ پێکهاتەی دیکەی کەرکووک بکرێت، کە دەرئەنجام ببیێتە هۆی نیگەرانکردنی شەقامی سیاسی کوردی و لێکترازانی یەکڕیزی کورد.

حەوتەم: دۆزی نەتەوەیی ئێمەی کورد لە ناوچە کوردستانییەکانی دەرەوەی هەرێم کێشەی خاکە لەگەڵ دەسەڵات، بۆیە دەبێت هاوڕا و هاوهەڵوێست بین تاوەکو بتوانین پارێزگاری لە دەستکەوتەکانی میللەتەکەمان بکەین.
 
پارتی: هەمووان بە گەڕانەوەی ئێمە دڵخۆش بوون

لەدوای هەڵبژاردنی پارێزگار و جێگرەکەی لە هۆتێل رەشیدی بەغدا لە 9ی ئابی 2024دا، (کە ئەوکات فراکسیۆنی پارتی و دوو ئەندامی بەرەی تورکمانی و سێ عەرەبی سوننە ئامادە نەبوون)، فراکسیۆنی پارتی بایکۆتی دانیشتنەکانی ئەنجوومەنی پارێزگایان کرد، بەڵام هەفتەی رابردوو، بڕیاریان دا بەشداربن.

سیروان سەید عاسی، بەرپرسی لقی سێی کەرکووکی پارتی گوتی: "کۆبوونەوەکە دەستپێشخەریی هەمووان بوو بە یەکێتیشەوە، ئەوەی دیاربوو ئەوەبوو کە هەموویان بە گەڕانەوەی پارتی دڵخۆش بوون."

شیوعی: نامەیەکی هاوبەشمان لەسەر دۆخی کەرکووک بۆ پارێزگار نووسی

دڵشاد حەساری، بەرپرسی مەڵبەندی حیزبی شیوعی لە کەرکووک بە رووداوی گوت: "تێگەیشتنی زۆر باش لەنێوان حیزبەکاندا هەبوو، پارتی دیموکراتی کوردستان پاکێجێکی حەوت خاڵی ئامادەکرد و هەمووان پەسندیان کرد، چونکە لەبارەی دۆخی ئێستای کەرکووک بوو."

دڵشاد حەساری گوتیشی: "هەموو حیزبەکان بە تێکڕا سەرکۆنەی هێرشەکانی سەر هەرێمی کوردستانیان کرد و هاوکات داوای لادانی ئەو عەسکەرتارییەتەیان کرد لە پارێزگاکە."

بە گوتەی بەرپرسی مەڵبەندی حیزبی شیوعی لە کەرکووک، لە سنووری پارێزگاکە "هێزی عەسکەر زاڵە و لە گوند و بازگەکاندا سەرانە لە خەڵکی سڤیل دەسەنرێت" و ئاماژەی بەوەشکرد، لەبارەی ئەو دۆخەوە نامەیەکی هاوبەشیان بۆ پارێزگاری کەرکووک نووسیوە.