رووداو دیجیتاڵ
دژەتیرۆری کوردستان دەڵێت، بەرەبەیانیی ئەمڕۆ هەینی، هێزەکانی هاوپەیمانان هەشت درۆنی بۆمبڕێژکراویان لە ئاسمانی هەولێر تێکشکاند و خستە خوارەوە.
دەشڵێت، هێرشەکان هیچ زیانێکی گیانییان لێ نەکەوتووەتەوە.
دژەتیرۆری کوردستان لە راگەیێندراوێکدا ئاماژە بەوە دەکات، "بە گوێرەی زانیارییەکانی دژەتیرۆری کوردستان، بەرەبەیانیی ئەمڕۆ هەینی 17ی تەممووزی 2026، لە کاژێر 4:19 تاوەکو 5:25، هێزەکانی هاوپەیمانان هەشت درۆنی بۆمبڕێژکراویان لە ئاسمانی هەولێر تێکشکاند و خستە خوارەوە، خۆشبەختانە هیچ زیانێکی گیانییان لێ نەکەوتەوە".
هاوکات، بەرەبەیانیی ئەمڕۆ هاونیشتمانییان لە سلێمانی و هەڵەبجەوە بە رووداویان گوت، گوێیان لە دەنگی تەقینەوەی "بەهێز" بووە.
سازگار سەڵاح، پەیامنێری رووداو لە هەڵەبجە گوتی: دەنگی پێنج تەقینەوە لە دەوروبەری هەڵەبجە بیستراون، هۆکارەکەی بە فەرمی ئاشکرا نەبووە. بەڵام باس لەوە دەکرێت کە هێرشی درۆنی بووبێت.
فازڵ هەورامی، بەرپرسی دێسکی ئینگلیزیی تۆڕی میدیایی رووداو لە ناوچەی هەورامان، لە سنووری پارێزگای سلێمانییەوە لەبارەی هێرشەکان رایگەیاند: "لە زڕگوێز لە نزیک کامپی حیزبە کوردییەکانی رۆژهەڵاتی کوردستان ئاگر کەوتووەتەوە و پێدەچێت بۆردوومان کرابن."
هەروەها فازڵ هەورامی باسی لەوەکرد کە "دەنگی تەقینەوە لە رۆژهەڵاتی شاری سلێمانی بیستراون، بەڵام بەگوێرەی زانیارییەکان ئامانجی هێرشە درۆنییەکە سلێمانی نەبووە، بەڵکو کامپ و بارەگای حیزبە کوردییەکانی رۆژهەڵاتی کوردستان بوون."
لە سلێمانی، هەڵەبجە و دەڤەری شارەزوورەوە هاونیشتمانییان ڤیدیۆ و زانیارییان بۆ رووداو نارد و باسیان لەوە کرد کە گوێیان لە دەنگی زیاتر لە 5 تەقینەوە بووە لە کاتی جیاوازدا.
