رووداو دیجیتاڵ بەگوێرەی ئاماری فەرمیی نەخۆشخانەکانی کەرکووک بۆ رووداو، لە چوار رۆژی جەژنی قوربانی ئەم ساڵدا 274 منداڵ لە پێنج نەخۆشخانەی ئەو پارێزگایەی باشووری کوردستان لەدایکبوون، بەڵام تەنیا 70یان کورد بوون. سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان دەڵێ: "گەشەی دانیشتووانی پارێزگاکە ناسرووشتییە". بەگوێرەی ئەو ئامارەی دەست تۆڕی میدیایی رووداو کەوتووە، دابەشبوونی ژمارەی لەدایکبووان لەو پێنج نەخۆشخانەیە لە چوار رۆژی جەژندا بەم شێوەیە بووە: - نەخۆشخانەی منداڵان و لەدایکبوون لەنێو شاری کەرکووک: 81 منداڵ - نەخۆشخانەی حەویجە لە پارێزگای کەرکووک: 83 منداڵ - نەخۆشخانەی ئازادی لە شاری کەرکووک: 60 منداڵ - نەخۆشخانەی گشتیی کەرکووک لە شاری کەرکووک: 40 منداڵ - نەخۆشخانەی داقووق لە پارێزگای کەرکووک: 10 منداڵ ئاماری ئەو پێنج نەخۆشخانەیە دەریدەخات، لە کۆی ئەو 274 منداڵەی لەو پارێزگایەی باشووری کوردستان کەرکووک لەدایکبوون، تەنیا 70 منداڵیان لە پێکهاتەی کوردن. ئەوە لە کاتێکدایە تەنیا لە قەزای حەویجە، کە زۆرینەی عەرەبنشینە، 83 منداڵ لەدایکبوون. فەهمی بورهان: گەشەی دانیشتووان ناسرووشتییە فەهمی بورهان، سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان، بە رووداوی راگەیاند، بەراوردی سەرژمێریی ساڵی 1957 و دۆخی ئێستا دۆخێکی تاڵ دەردەخات. فەهمی بورهان گوتی: "لە ساڵی 1957دا کەرکووک رووبەرێکی فراوانتر و جوگرافیایەکی گەورەتری هەبوو، کەچی کۆی ژمارەی دانیشتووانی تەنیا 388 هەزار کەس بوو، بەڵام لە ساڵی 2024دا ژمارەکە گەیشتە نزیکەی دوو ملیۆن و 200 هەزار کەس، لە کاتێکدا رووبەرەکەی زۆر کەم بووەتەوە." سەرۆکی دەستەی ناوچە کوردستانییەکان ئاماژەی بەوە کرد، ئەم گۆڕانکارییە گەورەیە لە دیمۆگرافیای پارێزگاکەدا "دۆخێکی سرووشتی نییە؛" هەروەها گوتی، ژمارەی دانیشتووانی قەزا و ناحیەکانی دەرەوەی ناوەند زۆر زیادی کردووە، بۆ نموونە قەزای حەویجە و ناحیەکانی زاب، عەباسییە و ریاز گەشەکردنیان گەیشتووەتە نزیکەی 400 هەزار کەس. فەهمی بورهان گوتی: "پشکی شێری ئەم گەشەکردنە بەر پێکهاتەی عەرەب دەکەوێ، بە رێژەیەک کە بەراورد ناکرێ لەگەڵ کورد و تورکمان. تەنانەت تورکمان ئێستا ژمارەیان لە جاران کەمتر بووەتەوە." هاوکات ئەحمەد عەزیز، لێکۆڵینڤان و نووسەری توێژینەوەی (کێ فەرمانڕەوای کەرکووکە؛ کورد یان نەیارانی) لە پارێزگای کەرکووک، بە رووداوی راگەیاند: "بە پێی داتا و زانیاری کۆکراوەی لای من، رێژەی کورد لە دامودەزگاکانی کەرکووکیش زۆر کەم بووەتەوە. بە گوێرەی ئەو لێکۆڵینڤانە، رێژەی گشتی کورد و نەتەوەکانی دیکە لەنێو دامودەزگاکان پێش 16ـی 10ـی 2017 بەم جۆرە بووە: -کورد 30% -عەرەب 54% -تورکمان 16% ئێستا: -کورد 23% -عەرەب 51% -تورکمان 23% رێژەی بەڕێوەبەرانی فەرمانگەکان پێش 16ـی 10ـی 2017 : -کورد 53% -عەرەب 19% -تورکمان 23% ئێستا -کورد 34% -عەرەب 39% -تورکمان 32% ئەحمەد عەزیز رایگەیاند: "رێژەی گەشەی دانیشتووانی کەرکووک هەموو پێوەرە جیهانیەکانی بەزاندووە، کە خۆی لەسەر ئاستی جیهان 1% کەمترە. بۆ نموونە، قەزای حەویجە لە ساڵی 2003 نزیکەی 130 هەزار کەس بووە، بەڵام ئێستا گەیشتوەتە نزیکەی 400 هەزار کەس، واتە نزیکەی 200% زیادی کردووە."
