زڕدایکی دوو کچەکەی سنە دەستگیرکرا

رووداو دیجیتاڵ

داواکاری گشتیی سنە دەڵێ، زڕدایکی ئەو دوو کچەی لە سنە ئەشکەنجەدران، دەستگیرکرا و لێکۆڵینەوە لە هۆکاری ئەشکەنجەدانەکە دەستی پێکردووە.

ئەمڕۆ سێشەممە، 9ی حوزەیرانی 2026، محەممەد جەباری، داواکاری گشتیی پارێزگای سنەی رۆژهەڵاتی کوردستان رایگەیاند: "زڕدایکی ئارین و نارین بە مەبەستی پاراستنی مافی ئەو دوو منداڵە و بەدواداچوون بۆ لایەنە جۆراوجۆرەکانی دۆسیەکە دەستگیرکرا."

محەممەد جەباری گوتی:"رێکاری یاسایی بەرامبەر هەموو ئەو کەسانە دەگیرێتەبەر کە لەم دۆسیەیەدا دەستیان هەبووە و هەرکەسێک رۆڵی هەبووبێت لەو رووداوەدا لە چوارچێوەی یاسادا لێپرسینەوەی لەگەڵ دەکرێ."

پێشتر باوکی ئەو دوو کچە بە فەرمانی دەسەڵاتی داد دەستگیرکرابوو و مافی بەخێوکردنی منداڵەکانیشی لێ وەرگیراوەتەوە.

سامان مەعرووفی، دراوسێی ماڵی ئارین و نارینە و ئەمڕۆ سێشەممە بە رووداوی راگەیاند:"یەکەم کەس بووم کە چوومە لای ئارین و نارین. ئەو کاتەی من چووم، ئەوان لە توالێتی ماڵەکە بوون و دۆخیان زۆر خراپ بوو."

سامان داوای لە هاونیشتمانییان کرد، پشتیوانی ئارین و نارین بن و یارمەتیان بدەن بۆ ئەوەی تەندروستیان باش بێت.

چیرۆکی ئەشکەنجەدانی ئارین و نارینی 7 و 15 ساڵ لە چەند رۆژی رابردوودا لەلایەن باوکیان و زڕدایکیانەوە دەنگدانەوەی زۆری لێکەوتەوە.

دوای بڵاوبوونەوەی هەواڵەکە و گواستنەوەی ئەو دوو کچە بۆ نەخۆشخانە، پارێزگاری سنە چووە سەر هێڵ و شوقەیەکی دایە دوو کچەکە.