رووداو دیجیتاڵ
بەراورد بە بودجەی 2023، پشکی دەستەی حەشدی شەعبی عێراق لە پڕۆژەیاسای بودجەی گشتیی 2027 بە رێژەی 40% زیادیکردووە، زیاتر لە یەک تریلیۆن دینار بۆ مووچە زیاد کراوە.
بەگوێرەی رەشنووسی پڕۆژەیاسای بودجەی گشتیی عێراق بۆ ساڵی 2027 کە دەست تۆڕى میدیایی رووداو کەوتووە، خەرجیی دەستەی حەشدی شەعبی 4.9 تریلیۆن دینارە، لەو بڕە 4.5 تریلیۆن دیناری بۆ مووچەی کارمەندانە.
بەراورد بە بودجەی 2023 بۆ 2025، خەرجیی دەستەی حەشدی شەعبی 1.4 تریلیۆن دینار زیادی کردووە، بەراورد بە رەشنووسی پڕۆژەیاسای بودجەی ساڵی داهاتوو ئەو خەرجییە 40% زیادیکردووە.
لە بودجەی پێشووی عێراق خەرجیی دەستەی حەشدی شەعبی 3.5 تریلیۆن دیناربووە کە 3.4 تریلیۆن دیناری بۆ مووچە بووە.
جەمال کۆچەر، ئەندامی لیژنەی دارایی پەرلەمانی عێراق بە تۆڕی میدیایی رووداوی راگەیاند، هێشتا نازانین بە وردی هۆکاری ئەو زیادبوونەوەی خەرجیی دەستەی حەشدی شەعبی لە پڕۆژە یاساکە چییە، بەڵام پێدەچێت پەیوەندیدار بێت بە خانەنشینکردنی کارمەندانیان و دامەزراندنی کەسانی دیکە لەجێگەیان، هەروەها پشکی دەستەکە لەو 50 هەزار گرێبەستەی لە بودجەی نوێدا بۆ دامەزراندن لە کەرتی سەربازیی دادەنرێت.
تاوەکو ئێستا یاسای خزمەتی دەستەی حەشدی شەعبی عێراق لە پەرلەمان پەسەند نەکراوە کە وردەکاریی مووچە و خانەنشینیی کارمەندانی ئەو دەستەیەی تێدایە.




