رووداو دیجتاڵ
گرووپى موقاوەى ئیسلامى لە عێراق رایگەیاند، 40 رۆژ گفتوگۆیان لەگەڵ لیژنەیەکى چوار کەسى هاوپەیمانیى چوارچێوەى هاوئاهەنگى کردووە و رێککەوتنیان لەبارەى "رێکخستنى چەک" واژۆ کردووە، بەڵام تاوەکو ئێستا حکومەت وەڵامى نەداونەتەوە و دەڵێن: " لەسەر ئەو بنەمایە پەیوەست نابین بە هەر وادە و رێککەوتنێک کە لایەنێکى حکومى و سیاسى باسى کردبێت یان باسى بکات".
ئەو هەڵوێستانەى گرووپى موقاوە لە راگەیێنراوێکدا بوو کە چوارشەممە 30ى ئەیلوولى 2026، بەبۆنەى کشانەوەى هاوپەیمانان لە عێراق بڵاویان کردەوە.
لە راگەیێنراوەکەدا هاتووە کە بۆ ماوەى 40 رۆژ گرووپى موقاوەمە لەگەڵ لیژنەیەکى چوار کەسى هاوپەیمانیى چوارچێوەى هاوئاهەنگى، کە بە رەزامەندى حکومەت پێکهێنراوە، گفتوگۆیان کردووە بۆ تاوتوێکردنى پرۆسەى "رێکخستنى چەک" بەرامبەر بە هێنانەدى سەروەریى تەواو و گشتگیرى عێراق لە رێگەى کشانەوەى سوپایى ئەمریکا و ناتۆ، لەگەڵ دەستگرتنى مقاوەمە بە مافى بۆ بەرپەرچدانەوەى راستەوخۆى هەر پێشێلکارییەکى ئەمریکا و ئیسرائیل لەدژى سەروەریى عێراق.
گرووپەکە دەڵێت، سەرەڕای ئەوەی کە چوار گرووپی موقاوەمە رێککەوتنێکیان لەگەڵ لیژنە چوار کەسییەکە واژۆ کردووە، بەڵام تاوەکو ئێستا وەڵامى حکومەتى عێراقیان پێنەگەشتووەتەوە.
ئەو لیژنە چوار کەسییەى هاوپەیمانى چوارچێوەى هاوئاهەنگى شیعەکان لەگەڵ گروپە چەکدارەکان گفتوگۆیان دەکرد بۆ ئەوەى بەشدار بن لە پرۆسەى سنووردارکردنى چەک لەدەستى دەوڵەت.
گرووپى مقاوەمە دەڵێت: "لەسەر ئەو بنەمایە پەیوەست نابین بە هەر وادە و رێککەوتنێک کە لایەنێکى حکومى و سیاسى باسى کردبێت یان باسى بکات. چەکى موقاوەمە وەک ئەمانەتێک لەدەست چەکدارەکانماندا دەمێنێت و نیشانەکەى بە ئاراستەى هەر دووژمنێک دەبێت کە هێرش بکاتە سەر عێراق و گەلەکەى. لەهەمان کاتدا دەرگاشمان کراوە دەبێت بەڕووى هەر دیالۆگێک کە سەروەریى عێراق گەرەنتى بکات".
گرووپى مقاوەمەى ئیسلامى لە عێراق لە چەند گرووپێکى چەکدارى شیعە پێکهاتوون، کە وابەستەى کۆمارى ئیسلامى ئێرانن و لە جەنگەکانیاندا لەگەڵ ئەمریکا و ئیسرائیل هاوکار بوون.
هەڵوێستى ئەو گرووپە هاوکات بوو لەگەڵ کشانەوەى هاوپەیمانان لە عێراق، کە مەرجى گرووپە چەکدارەکان بوو بۆ بەشداریکردنیان لە پرۆسەى سنووردارکردنى چەک لەدەستى دەوڵەت.
لە گوتارى تایبەت بە کشانەوەى هاوپەیمانان، عەلى فالح زەیدى، سەرۆکوەزیرانی عێراق گوتى: "جەخت لەوە دەکەینەوە هیچ چەکێک لە دەرەوەى چەترى یاسا و هیچ هێزێک لە دەرەوەى دامەزراوەکانی دەوڵەتدا نابن، ئەمە ئەوەیە کە دەستوور دەیەوێت و مەرجەعیەت داواى کردووە و گەلی عێراق دەیەوێت."
پێشتر لە 22ـی ئەیلوولى 2026، حەیدەر فوئادى، سەرۆکى مەکتەبى سیاسى هاوپەیمانیى ئاوەدانکردنەوە و گەشەپێدان کە یەکێکە لە پێکهێنەرانى هاوپەیمانیى چوارچێوەى هەماهەنگى، بە تۆڕى میدیایی رووداوى راگەیاند: "پێشنیازێکى شەش خاڵى لەلایەن حکومەتەوە دراوەتە گرووپە چەکدارەکان بۆ ئەوەى رێککەوتنى لەسەر بونیات بنرێت کە دوا قۆناخى مانگى تەمووزى 2027 دەبێت".
.webp&w=3840&q=75)