رووداو دیجیتاڵ
نوێنەرانی وەزارەتی پلاندانانی عێراق و شاندێکی هەرێمی کوردستان لەبارەی بودجەی 2027 کۆبوونەوە، بەگوێرەی وەزارەتەکە باس لە جێگیرکردنى شایستە داراییەکانى هەرێمى کوردستان و گەرەنتیکردنی پشکەکەى لە بودجەى وەبەرهێنان کراوە.
کۆبوونەوەکە رۆژی چوارشەممە 9ی ئەیلوولی 2026 لە بەغدا کراوە. ماهیر حەماد جۆهان، بریکاری وەزارەتی پلاندانانی عێراق لەگەڵ شاندی هەرێمی کوردستان بە سەرۆکایەتیی ئومێد سەباح، سەرۆکی دیوانی ئەنجوومەنی وەزیران، تاوتوێی بودجەی 2027یان کردووە.
وەزارەتی پلاندانانی عێراق رایگەیاند، لەو کۆبوونەوەدا تاوتوێی رەشنووسی پڕۆژەیاسای بودجەی گشتیی 2027 و جێگیرکردنی شایستە داراییەکانی هەرێمی کوردستان کراوە.
بەگوێرەی ئەو وەزارەتە، گفتوگۆ لەبارەی بودجەى وەبەرهێنان بۆ ساڵی 2027 کراوە، بۆ ئەوەی رێکاری گەرەنتیکردنی پشکی هەرێمی کوردستان لەو خەرجییە بدۆزنەوە.
بڕیارە پڕۆژەیاسای بودجەی گشتیی عێراق بۆ ساڵى 2027 لە کۆتایی ئەم مانگەدا لە ئەنجوومەنی وەزیرانەوە رەوانەی پەرلەمان بکرێت.
