دەکرێت هۆڕمۆنەکانی خەو بۆ کەمکردنەوەی ئازاری دوای نەشتەرگەریش بەکاربێن

رووداو - تەندروستی

بەگوێرەی توێژینەوەییەکی نوێی کۆمەڵەی پزیشکانی بێهۆشکاریی ئەمریکا، باشترکردنی خەو لە رێگەی بەکارهێنانی میلاتۆنین یان زۆلپیدێم پێش نەشتەرگەری، ئەگەری هەیە دڵەڕاوکێ کەمبکاتەوە، ئازاری دوای نەشتەرگەری سووکتر بکات و یارمەتیی نەخۆشەکان بدات خێراتر چاک ببنەوە.

توێژەران لە قوتابخانەی پزیشکیی یەیڵ لە ئەمریکا دەڵێن، خەوی ناتەواو و دڵەڕاوکێ پێش نەشتەرگەری باون و دەتوانن ببنە هۆی زیادبوونی هەستیاری بۆ ئازار و هێواشبوونەوەی پرۆسەی چاکبوونەوە.

میلاتۆنین

میلاتۆنین، هۆرمۆنێکی سرووشتییە و بەکارهێنانی پەیوەستکراوە بە کەمبوونەوەی دڵەڕاوکێ، ئازار و هەوکردن. هەروەها بەکارهێنانی ئازارشکێنە بەهێزەکانی بە رێژەی زیاتر لە 30% کەمکردووەتەوە و یارمەتیی نەخۆشەکانی داوە بگەڕێنەوە بۆ شێوازی ئاسایی خەو و چالاکیی رۆژانەیان. ئەم دەرمانە لەوانەیە سوودی زیاتری بۆ کەسانی بەتەمەن هەبێت کە ئەگەری تووشبوونیان بە سەرلێشێواوی دوای نەشتەرگەری زیاترە.

زۆلپیدێم

زۆلپیدێم، دەرمانێکی باوی خەوە کە بە رەچەتەی پزیشک دەدرێت. ئەم دەرمانە یارمەتیی ئەو نەخۆشانەی داوە کە کێشەی خەویان هەبووە باشتر بخەون و ئازاری دوای نەشتەرگەری کەم کردووەتەوە. بۆ نموونە، ئەو نەخۆشانەی نەشتەرگەریی کۆڵۆنیان بۆ کراوە و ئەم دەرمانەیان بەکارهێناوە، پێویستییان بە بڕێکی کەمتری ئازارشکێن بووە و ئاستی هەوکردنیشیان نزمتر بووە.