رووداو دیجیتاڵ
لەگەڵ دابەزینی نرخی زێڕ لە بازاڕەکانی جیهان، لە هەرێمی کوردستان نرخی مسقاڵێک زێڕ بەراورد بە دوێنێ زیاتر لە 15 هەزار دینار دابەزی.
عەبدوڵڵا ئەکرەم، جێگری سەرۆکی سەندیکای زێڕنگرانی هەولێر، ئەمڕۆ هەینی بە تۆڕی میدیایی رووداوی گوت: "ئەمڕۆ نرخی مسقاڵێک زێڕی عەیار 21 بە 951 هەزار دینارە، هەروەها عەیاری 22 بە 996 هەزار دینارە".
دوێنێ مسقاڵێک زێڕی عەیار 21 لە بازاڕەکانی هەرێمی کوردستان 967 هەزار دینار بوو، لەکاتێکدا 24ی مانگی رابردوو یەک مسقاڵ گەیشتبووە ملیۆنێک دینار.
هەر ئەمڕۆ نرخی مسقاڵێک زێڕی عەیار 18 بە 815 هەزار دینار و عەیاری 14 بە 633 هەزار دینارە.
نرخی زێڕ لە بازاڕەکانی هەرێمی کوردستان لەسەر بنەمای نرخی ئۆنسەیەک بە 4 هەزار و 351 دۆلار و 100 دۆلار بەرامبەر 155 هەزار و 750 دینار دیاری کراوە.
بەراورد بە دوێنێ، ئەمڕۆ ئۆنسەیەک زێڕ لە بازاڕەکانی جیهان 80 دۆلار دابەزیوە.
بەرزبوونەوەی نرخی نەوت و کێشە جیۆپۆلیتیکییەکان، چاوەڕوانیی بازاڕەکانی جیهان بۆ داتاکانی هەڵاوسانی ئەمریکا و بەرزبوونەوەی بەهای دۆلار بە هۆکارەکانی دابەزینی بەهای زێڕ دادەنرێن.
