رووداو دیجیتاڵ نرخی زێڕ رۆژی هەینی گەیشتە بەرزترین ئاستی لە ماوەی زیاتر لە سێ مانگی رابردوودا و سێ هەفتەیە بەردەوام رووی لە بەرزبوونەوەیە. هۆکاری بەرزبوونەوەی نرخەکەش بۆ تێپەڕاندنی ئاستە تەکنیکییە سەرەکییەکان و دابەزینی بەهای دۆلار دەگەڕێتەوە کە دوای پلانی پاڵپشتیی کڕینەوەی وەزارەتی گەنجینەی ئەمریکا روویداوە. رۆژی هەینی، نرخی زێڕ بە رێژەی 2.3% بەرزبووەوە و گەیشتە 4603 دۆلار بۆ هەر ئۆنسەیەک. هەروەها نرخی زێڕ لە گرێبەستەکانی داهاتوودا بە رێژەی 2.4% بەرزبووەوە و بە 4,680.60 دۆلار مامەڵەی پێوەکرا. لە ماوەی تەنیا یەک هەفتەدا، نرخی ئەو کانزا زەردە نزیکەی 5% زیادی کردووە. ئێستا نرخی زێڕ لە سەرووی تێکڕاکانی 50 رۆژە، 100 رۆژە و 200 رۆژییەوە مامەڵەی پێوەدەکرێت؛ شرۆڤەکاران ئەمە بە هێمای گۆڕینی ئاراستەی نرخەکە بەرەو بەرزبوونەوەی زیاتر دەبینن. بارت مالیک، سەرۆکی جیهانیی ستراتیژیی کاڵاکان لە کۆمپانیای (تی دی سیکیۆریتی) لەو بارەیەوە دەڵێت: "بەدڵنیاییەوە فاکتەری تەکنیکی هۆکارێکی گەورەیە؛ ئەگەر ئەم هێزی پاڵنەرە بەردەوام بێت، هەنگاوی داهاتوو 4,700 دۆلارە، بەڵام پێشموایە دابەزینی بەهای دۆلاری ئەمریکی پاڵنەرێکی زۆر بەهێز بووە." دۆلار لە نزیک نزمترین ئاستی خۆیدایە لە دوای ناوەڕاستی مانگی ئایارەوە، ئەوەش بەهۆی ئەوەی وەبەرهێنەران گومانیان هەیە لەوەی هەوڵەکانی وەزارەتی گەنجینەی ئەمریکا بۆ هێورکردنەوەی بازاڕی قەواڵە داراییەکان، لە کۆتاییدا ببێتە هۆی لاوازکردنی متمانە بە دۆلار. رۆژی پێنجشەممە سکۆت بێسێنت، وەزیری گەنجینەی ئەمریکا رایگەیاند، حکومەت دەتوانێت کڕینەوەی بۆندەکان زیاتر فراوان بکات؛ ئەمەش تەنیا رۆژێک دوای ئەوە هات کە وەزارەتەکە پلانی خۆی بۆ دوو هێندەکردنی کڕینەوەی قەواڵە داراییە درێژخایەنەکان ئاشکرا کرد. بانکی (گۆڵدمان ساکس) لە تێبینییەکدا رایگەیاندووە: "داواکاری لەسەر گرێبەستەکانی زێڕ بە شێوەیەکی بەرچاو زیادی کردووە و ئەمەش پاڵپشتییەکی گەورەیە بۆ بەرزکردنەوەی نرخەکان." گۆڵدمان ساکس ئاماژەی بەوەش کردووە، لاوازبوونی متمانەی بازاڕ سەبارەت بە بەرزکردنەوەی رێژەی سوودی بانکی لە ئەمریکا (دوای وەستانی بڕیارەکانی بانکی ناوەندیی ئەمریکا لە مانگی تەممووزدا) و لاوازیی داتا ئابوورییەکان، یارمەتیدەر بوون لە زیندووکردنەوەی گرەوەکان لەسەر بەرزبوونەوەی زیاتری نرخی زێڕ.
