رووداو دیجیتاڵ
دەستەی وەبەرهێنانی هەرێمی کوردستان رایدەگەیێنێت، لەمەودوا رێگە نادرێ کڕین و فڕۆشتن بەو پڕۆژانەوە بکرێت کە وەبەرهێنانن. گوتەبێژی دەستەکە دەڵێ، هەرکەس پێچەوانەی بڕیارەکان رەفتار بکات لێپێچینەوەی لەگەڵدا دەکرێت تاوەکو لێسەندنەوەی مۆڵەت.
رۆژی دووشەممە، 4ـی ئایاری 2026، بەڕێوەبەرایەتی وەبەرهێنانی هەولێر رایگەیاند، "مامەڵەی کڕین و فرۆشتن بە پێکهاتە و یەکەکانی ناو پڕۆژەکانی وەبەرهێنان لەم پڕۆژانەی کە لە ژێر سێکتەرەکانی گەشتیاری، بازرگانی و تێکەڵاو بەهیچ شێوەیەک نابێت بکرێت، جگە له پڕۆژەکانی نیشتەجێبوون".
بەرگەشت ئاکرەیی، گوتەبێژی دەستەی وەبەرهێنانی هەرێمی کوردستان، ئەمڕۆ بە تۆڕی میدیایی رووداوی گوت: "بڕیارەکە بۆ هەموو هەرێمی کوردستانە و ئەمڕۆ هەولێر بڵاوی کردووەتەوە، چونکە دەمانەوێت وەبەرهێنی راستەقینە پڕۆژە وەربگرێت".
بەگوێرەی دەستەی وەبەرهێنان، پشتر پڕۆژەی وەبەرهێنان دراوە بە خەڵک و پێش تەواوکردن فرۆشراوەتەوە بە کەسی دیکە و کەسەکە خۆی پڕۆژەکەی تەواو نەکردووە. بەرگەشت ئاکرەیی دەڵێت: "دەمانەوێت ئەوە نەمێنێت، بۆیە هەرکەس پڕۆژەی وەرگرت ئەگەر بیفرۆشێت مامەڵەی بەناوکردنی بۆ کەسی دیکە بۆ ناکرێت".
گوتەبێژی دەستەی وەبەرهێنان دەڵێ: "هەرکەس پڕۆژەی وەبەرهێنان وەربگرێت و بیفرۆشێتەوە جگە لەوەی رێگەنادەن بە بەناوکردنی کڕیار، پێدەچێت مۆڵەتەکەشی هەڵوەشێندرێتەوە".
بە گوتەی بەرگەشت ئاکرەیی، بەڕێوەبەرایەتییەکانی وەبەرهێنان لە کاتێکدا دەتوانن مامەڵەی بەناوکردن بۆ خاوەن پڕۆژەکان بکەن لەکاتی فرۆشتنەوە، کە پڕۆژەکە لانیکەم 50%ـی تەواو کرابێ، ئەوکاتەش خاوەن پڕۆژە بۆی هەیە 25%ـی پڕۆژەکەی بکات بەناوی هاوبەشێکەوە نەوەکو هەمووی بفرۆشێت.
لە راگەیێندراوەکەی بەڕێوەبەرایەتی وەبەرهێنانی هەولێردا کە بە ژمارە 3195 دەرکراوە هاتووە: "ئەنجامدانی گرێبەست و مامەڵەی کڕین و فرۆشتن لە پڕۆژەکانی وەبەرهێنان هیچ بەهایەکی یاساییان نییە [جگە لە پڕۆژەکانی نیشتەجێبوون]، بە هیچ جۆرێک گەرەنتی مافی کڕیاران ناکات".