رووداو دیجیتاڵ
دوای ئەوەی هێرشە سەربازییەکانی ئەمریکا بۆ سەر ئێران هیوای رێککەوتنێکی نزیکی بۆ کردنەوەی تەنگەی هورمز کەمکردەوە، نرخی نەوت گەڕایەوە 100 دۆلار و بەهای دۆلار بەرزبووەوە.
لەدوای ئاگربەستە ناسکەکەی 8ی نیسانەوە، ئەمریکا و ئێران خەریکی کارکردن بوون لەسەر رێککەوتنێک بۆ کۆتاییهێنان بە جەنگی رۆژهەڵاتی نێوەڕاست و کردنەوەی رێڕۆ ئاوییە گرنگەکە بە رووی کەشتییەکانی نەوت و باردا.
رۆژی سێشەممە 26-05-2026، هێرشە نوێیەکان وایان لە تاران کرد هۆشداریی تۆڵەکردنەوە بدات، دوای ئەوەی واشنتنی بە پێشێلکردنی ئاگربەستەکەیان تۆمەتبار کرد. فەرماندەیی ناوەندیی ئەمریکا هێرشەکانی بە "هێرشی بەرگری لەخۆکردن" وەسفکرد.
رۆژی دووشەممە، بازاڕەکانی پشک بەهۆی راپۆرتەکانەوە سەبارەت بە ئەگەری رێککەوتن بەرزبوونەوە و نرخی نەوتی خاو بۆ خوار 100 دۆلار دابەزیبوو، بەڵام دوای ئەوەی هێزەکانی ئەمریکا رایانگەیاند هێرشیان کردووەتە سەر کۆگەی مووشەکی لە باشووری ئێران و ئەو بەلەمانەی هەوڵی دانانی مینیان داوە، دۆخەکە پێچەوانە بووەوە.
نرخی نەوتی خاوی برێنتی دەریای باکوور، کە پێوەرە نێودەوڵەتییەکەیە، رۆژی سێشەممە نزیکەی 4.5٪ بازیدا و گەڕایەوە سەرووی 100 دۆلار.
ژمارەی بازاڕەکانی پشک تێکەڵ بوون، پێنوێنی داو جۆنز کەمێک دابەزی، بەڵام ناسداک و ئێس ئاند پی 500 بەرزبوونەوە.
لە ئەورووپا، بازاڕەکانی فرانکفۆرت و پاریس بە نزیکەی 1٪ دابەزین، لە کاتێکدا لەندەن تەنیا 0.2٪ بەرزبووەوە.
رەس مۆڵد، بەڕێوەبەری وەبەرهێنان لە کۆمپانیای (AJ Bell)، ئاماژەی بەوە کرد "بەردەوامیی گومانەکان لەبارەی ئەگەری رێککەوتنێک و هێرشە پێشوەختەکەی دوێنێ شەوی ئەمریکا بۆ سەر ئێران، واتای ئەوەیە گەشبینی زۆر نییە."
کەیسلین بروکس، بەڕێوەبەری توێژینەوە لە کۆمپانیای (XTB)ـیش هۆشداریدا و گوتی، دوورخستنەوەی چاوەڕواننەکراوی سەرۆکی کۆمپانیای بی پی (BP)، "ئاماژەیە بۆ نەبوونی سەقامگیری لە کۆمپانیاکەدا."