رووداو دیجیتاڵ
بانکی ناوەندیی تورکیا رێژەی سوودی بانکی لە 45٪ بۆ 50٪ بەرزکردەوە و کاریگەری راستەوخۆی کردە سەر بەهای دۆلاری ئەمریکی بەرامبەر لیرەی تورکی. یەک دۆلار بە 31.90 لیرە مامەڵەی پێوە دەکرێت. ئەمە لە کاتێکدایە هەر ئەمڕۆ، یەک دۆلار بەرامبەر 32.42 لیرە مامەڵەی پێوەکرا.
بەیانی رۆژی پێنجشەممە، 21ـی ئاداری 2024، لەگەڵ کرانەوەی بۆرسە و بازاڕە داراییەکانی تورکیا، یەک دۆلاری ئەمریکی بە 32.40 لیرە مامەڵەی پێوەکرا؛ دواتر بۆ 32.42 لیرە بەرزبووەوە.
هاوکات، یەک یۆرۆ بە 35.31 لیرە و یەک پاوەندی ئیستەرلینی بە 40.94 لیرە مامەڵەی پێوە کرا. بەڵام دوای نیوەڕۆی ئەمڕۆ، ئەنجوومەنی سیاسەتی نەختینەیی دراوی بانکی ناوەندیی تورکیا بڕیاریدا بە زیادکردنی 500 خاڵی بنەڕەتی و بەمەش سوودی بانکی لە 45٪ بۆ 50٪ بەرزکردەوە.
راستەخۆ دوای بڕیارەکە، لیرەی تورکی بە رێژەی 1.02٪ بەرزبووەوە و یەک دۆلار بەرامبەر 31.79 لیرە مامەڵەی پێوەکرا و دوای دوو کاژێری دیکە یەک دۆلار بە 31.88 لیرە مامەڵەی پێوەکرا.
لە کاتی داخستنی بازاڕەکانیشدا، یەک دۆلار گەیشتە 31.90 لیرە. بەمەش لە کۆتایی رۆژدا یەک دۆلاری ئەمریکی بەرێژەی ٪61.03 دابەزی.
نزیکەی هەشت مانگە بەهای لیرەی تورکی بەرامبەر دۆلار و دراوە بییانییەکانی دیکە بەهۆی بەرزبوونەوەی قۆناخ بە قۆناخی هەڵاوسانی ئابووری وڵات و جێگیرکردنی سوودی بانکییەوە، لە دابەزیندایە. لیرەی تورکی لە هەشت مانگی رابردوودا نزیکەی ٪11.3ی بەهای خۆی لەدەستداوە.
بەر لە هەڵبژاردنەکانی پەرلەمانی تورکیا لە 14ـی ئایاردا یەک دۆلار بە 19.60 لیرە مامەڵەی پێوە دەکرا؛ لە دووەم گەڕی هەڵبژاردنی سەرۆکایەتی تورکیا کە لە 28ـی ئایار کرا، بۆ یەکەمین جار بەهای یەک دۆلار 20 لیرەی تێپەڕاند و دوای هەڵبژاردنەکان بۆ یەکەمجار لە 26ـی حوزەیراندا بەهای یەک دۆلار گەیشتە 26 لیرە.
بانکی ناوەندیی تورکیا رۆژی 22ـی شوباتی 2024 سوودی بانکی رێژەکەی لە 45٪ بە جێگیری هێشتیەوە.
ئەمە لە کاتێکدایە بانکی ناوەندیی تورکیا ساڵی 2022 چوار جار لەسەر یەک سوودی بانکی کەمکردەوە و لە کۆبوونەوەی شوباتی 2023ـدا سوودی بانکی لە 9٪ بۆ 8.5٪ کەمکردبووەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ