رووداو دیجیتاڵ
لە کۆبوونەوەی پەرلەمانی عێراقدا دەنگ لەسەر مادەکانی 2-9-10-11 و 12 درا؛ دوایین مادەیان تایبەتە بە پشکی هەرێمی کوردستان لە بودجەکەدا کە بڕەکەی 12.67% لە کۆی بودجە.
کۆبوونەوەی پەرلەمانی عێراق بۆ دەنگدان لەسەر پڕۆژەیاسای بودجە بەردەوامە؛ ئەمشەو بە زۆینەی دەنگ مادەکانی2-9-10-11 و 12ـی پەسند کرد. مادەی 12 تایبەتە بە پشکی هەرێمی کوردستان و وەکو خۆی پەسند کراوە، کە پێشتر لە لیژنەی دارایی عێراق دەنگی لەسەر دراوە و 12.67٪ی بودجەکە بۆ هەرێمی کوردستان تەرخانکراوە.
پشکی هەرێمی کوردستان لە بودجەدا 12.67٪ـە و لەلایەن هەموو هێزە سیاسییەکانەوە لە زنجیرەیەک کۆبوونەوەدا پێشتریش رێککەوتنی لەسەر کرابوو.
بودجەی ساڵی 2023 بریتییە لە زیاتر لە 197 تریلیۆن دینار، بەو پێیە پشکی هەرێمی کوردستان زیاتر دەبێت لە 24 تریلیۆن دینار کە زیاتر لە 19 ملیار دۆلار دەبێت.
مادەی 13ـی و 14ـی پڕۆژەیاسای بودجە
کۆبوونەوەی پەرلەمانی عێراق لەسەر مادەکانی بودجە بەردەوامە و لە مادەی 13دایە کە تایبەتە بە هەرێمی کوردستان. مادەی 14ش تایبەتە بە هەرێمی کوردستان.
لەنێو مادەکانی 13 و 14دا بڕگەی جیاواز هەن کە ئەمانەی خوارەوەن کە هەندێک گۆڕانکارییان تێدا کراوە:
- شایستە داراییەکانی نێوان حکومەتی عێراق و حکومەتی هەرێمی کوردستان بۆ ساڵی 2004 تاوەکو 2022 یەکلایی دەکرێتەوە، ئەوەش دوای وردبینی لەلایەن دیوانی چاودێریی دارایی فیدراڵیی عێراق و دیوانی چاودێریی دارایی هەرێمی کوردستان.
- دیاریکردنی بڕە هەناردەی نەوتی هەرێمی کوردستان.
- حکومەتی هەرێمی کوردستان پابەند دەبێت بە رادەستکردنی داهاتە نانەوتییەکانی بە گەنجینەی دەوڵەت بەپێی یاسای بەڕێوەبردنی دارایی، بەڵام دەبێت هەردوو دیوانی چاودێریی دارایی فیدراڵی و هەرێمی کوردستان، وردبینی لە داتاکاندا بکەن.
- وەزارەتی دارایی عێراق پابەند دەبێت مانگانە شایستەکانی هەرێمی کوردستان بدات، ئەوەش بە هاوئاهەنگی لەگەڵ وەزارەتی دارایی و ئابووریی هەرێمی کوردستان.
- قەرزەکانی بانکی بازرگانیی عێراق لە رەسیدی بانکی عێراقی لای بانکە حکومی و تایبەتییەکان یەکلایی دەکرێتەوە و دەبێت هەرێمی کوردستان قەزەکانی لە بەشە بودجەکەی خۆی بداتەوە.
- کۆی داهاتی نەوتی بەرهەمهێنراو لە کێڵگەکانی نەوتی هەرێمی کوردستان لە یەک هەژماری بانکی دادەنرێت؛ چۆنییەتی خەرجکردنەکەی جارێ روون نەبووەتەوە و چەند پێشنیازێکی بۆ کراوە.
