ئەلۆنسۆ هەواڵە ناخۆشەکەی راگەیاند

دوای ئەوەی لە دوو یاریی رابردووی مۆندیالی یانەکاندا نەیتوانی بەشداری بکات، بەهۆی ئەو نەخۆشییەی تووشی بووبوو، جارێکی دیکە ئێمباپێ گەڕایەوە نێو مەشق و راهێنانە بە کۆمەڵەکانی یانەی ریال مەدرید و بەشداریی لە مەشقەکاندا کرد.

ریال مەدرید بەرەبەیانی رۆژی هەینی دوایین یاریی خۆی لە قۆناخی کۆمەڵەکاندا بەرامبەر یانەی سالزبۆرگی نەمسایی ئەنجامدەدات و پێویستی بەبردنەوە یان یەکسانبوون هەیە بۆ ئەوەی بگاتە قۆناخی شازدەی مۆندیالی یانەکان.

چابی ئەلۆنسۆ لەبارەی بەشداریکردنی ئێمباپێ لە یارییەکەدا گوتی "دڵخۆشم ئێمباپێم لەنێو یاریگەدا بینی و گەڕایەوە، بەڵام ناتوانێت بەشداری لە یارییەکەدا بکات."

راهێنەری ریال مەدرید زیاتر گوتی "پێمباشە ئێمباپێ بۆ قۆناخی 16 ئامادەبێت و خەریکە چاکدەبێتەوە."

کیلیان ئێمباپێ لە سەرەتای پاڵەوانێتییەکەدا تووشی دۆخێکی نەخوازراو بوو و بەهۆی هەوکردنی گەدە و ریخۆڵەوە گواسترایەوە بۆ نەخۆشخانە و دوای ئەوەش لەژێر چاودێری پزیشکەکانی ریال مەدریددا لە شوێنی مانەوەی یانەکە بەتەنیا راهێنانی پێ دەکرا، بەو هۆیەوە یاریزانەکە بەرامبەر هەردوو یانەی هیلال و پاچوکا یاریی نەکرد و بۆ یاریی سێیەمیش ئامادەنییە.

ریال مەدرید لە ئەگەری بردنەوەی یارییەکە، بە یەکەمی کۆمەڵەی هەشتەم سەردەکەوێت و بەرامبەر دووەمی کۆمەڵەی حەوتەم یاری دەکات، کە یەکێک لە مانچێستەر سیتی یان یوڤێنتوس دەبێت.

یارییەکەی ریال مەدرید و سالزبۆرگ بەرەبەیانی رۆژی هەینی کاژێر 04:00 دەکرێت و بە ئەنجامدانی ئەم یارییە، قۆناخی کۆمەڵەکانی مۆندیالی یانەکان کۆتاییدێت.