ڤیدیۆ؛ مێسی هاتریکی تۆمارکرد و ئەرجەنتین سەرکەوتنێکی گەورەی بەدەستهێنا

لە رکابەرییەکانی گەڕی دەیەمی پاڵاوتنەکانی ئەمریکای باشوور، بۆ گەیشتن بە مۆندیالی 2026، هەڵبژاردەی ئەرجەنتین میوانداریی بۆلیڤیای کرد و یارییەکەی بە شەش گۆڵی بێبەرامبەر لێبردەوە.

لیۆنێل مێسی ئەستێرەی یەکەمی یارییەکە بوو، هاتریکی تۆمارکرد و سەرکردایەتیی تیپەکەی کرد بۆ بردنەوەی یارییەکی دیکە و نزیکبوونەوە لە گەیشتن بە مۆندیال.

گۆڵەکانی دیکەی تانگۆ لەلایەن لاوتارۆ مارتینێز، جولیان ئەلڤارێز و تیاگۆ ئەلماداوە تۆمارکران.

ئەرجەنتین بە شەش گۆڵی بێبەرامبەر یارییەکەی بردەوە و لە پلەی یەکەمی ریزبەندی هەڵبژاردەکانی ئەمریکای باشوور بووە خاوەنی 22 خاڵ و بە جیاوازیی 3 خاڵ لە پێش هەڵبژاردەی کۆڵۆمبیای دووەمە.

مێسی ژمارەی هاتریکەکانی بەدرێسی ئەرجەنتینەوە گەیاندە 10 هاتریک و یەکەم یاریزانە ئەو ژمارەی هاتریکە بۆ هەڵبژاردەکە تۆماربکات.

لیۆ لە کاروانی وەرزشییدا گەیشتە 58 هاتریک و بە تۆمارکردنی سێ گۆڵ و دروستکردنی دوو گۆڵ بووە باشترین یاریزانی یارییەکە.