کارلۆ ئەنچێلۆتی
رووداو دیجیتاڵ
زانکۆی پارمای ئیتاڵیا رێزی لە کاروانی کارکردنی کارلۆ ئەنچێلۆتی، راهێنەری بەنێوبانگی ئیتاڵی و یانەی ریال مەدریدی ئیسپانی گرت و دکتۆرای شانازیی لەلایەن زانکۆکەوە پێدرا.
لە رێوڕەسمێکدا کە سەرۆکی زانکۆ و چەندین کەسایەتی تێیدا ئامادەبوون، لە زانکۆی پارما بە مارشی ریال مەدرید پێشوازی لە کارلۆ ئەنچێلۆتی کرا و دکتۆرای شانازی لە زانست و تەکنیکە چالاکی و جوڵە خۆپارێزییەکان بە راهێنەرە ئیتاڵییەکە درا.
کارلۆ ئەنچێلۆتی دوای وەرگرتنی دکتۆراکە قسەیکرد و گوتی " هەمووان دەزانن من کەسێکی بێدەنگم، لە راستیدا من زۆر ئامارامم و زۆر سەبرم هەیە، هەروەها هەوڵدەدەم زیاتر قایلکردن بەکاربهێنم وەک لە خۆ سەپاندن، من ئەوە لە ئەریگۆ ساکییەوە فێربووم."
کارلۆ لە پەیامێکدا کە لە ئێکس بڵاویکردووەتەوە نووسیوویەتی "زۆر بەپەرۆشم و شەرەفێکی گەورەیە کە ئەم دکتۆرایەم پێدراوە، سوپاسێکی دڵسۆزانە بۆ ماڵباتەکەم و هەموو ئەو کەسانەی یاوەرم بوون و بەردەوامن لە یاوەریکردنم لە ژیانی پیشەییمدا."
پاوڵۆ ئاندرێ، سەرۆکی زانکۆی پارما لە رێوڕەسمەکەدا گوتی "لە ساڵی 2024 سەرگەرمییەکی نوێ و نائاسایی چاوەڕێی ئەنچێلۆتی دەکات، ئەوە بۆ زۆر کەس و راهێنەرەکانیش وەک خەون وایە، ئەو دەبێتە راهێنەری هەڵبژاردەی بەرازیل، کە دەبێتە یەکەم کەسی دەرەوەی وڵاتەکە لە دوای 60 ساڵ پۆستی راهێنەرایەتیی ئەو هەڵبژاردەیە وەربگرێت."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ