رووداو دیجیتاڵ
کارلۆ ئەنچیلۆتی، راهێنەری یانەی ریال مەدرید لە چاوپێکەوتنێکی رۆژنامەڤانیدا باسی داهاتووی خۆی و پەیوەندی لەگەڵ سەرۆکی ریال مەدرید کردووە، هەڵوەستەی لەسەر خولی سعودیە کردووە و خۆشترین شاریشی بۆ ژیان هەڵبژاردووە.
کارلۆ کە ئەمساڵ لەگەڵ ریال مەدرید نازناوی جامی شای ئیسپانیای بەدەستهێناوە، باسی خولی سعودیە و چوونی ئەستێرە گەورەکانی ئەوروپا بۆ ئەو خولە دەکات، ئەو دەڵێت سعودیە دەتوانێ بگاتە ئامانجەکەی خۆی و رکابەریی لەگەڵ خولە گەورەکانی ئەوروپادا بکات.
کارلۆ دەڵێ، "سعودیەکان لە تۆپی پێ تێگەیشتوون، دەزانن ئەو یارییە سەرنجی خەڵک رادەکێشێت، خواستی گەورە بۆ تۆپی پێ هەیە و ئەوانیش دەیانەوێت خولەکەیان لە ئاستی خولە گەورەکانی ئەوروپا بێت و ئەوەشیان پێدەکرێت".
خولی سعودیە لە زستانی رابردووەوە بووەتە جێگەی سەرنج و رووگەی ئەستێرەکان و پاش چوونی کریستیانۆ رۆناڵدۆ بۆ ئەو خولە، کەریم بنزیماش رووی لە یانەی ئیتحادی سعودی کرد و چەندین یاریزانی دیکەش بەڕێگەوەن.
کارلۆ ئەنچیلۆتی باسی لە ئەزموونی خۆی لە تۆپی پێدا کردووە و دەڵێ، "تۆپی پێ وایکرد گەشت بە هەموو دونیادا بکەم و فێریکردن چۆن بژیم. ئیتاڵیا باشترین شوێنە، بەڵام مەدرید شارێکی نموونەییە، لەندەن و پاریس نایابن، بەڵام گرانن، مۆناکۆ شارێکی جوانە و کەنەدا وڵاتی سرووشتە و بەئازادی هەڵسوکەوتی تێدا دەکرێت. من حەزم بەژیانە لەو شوێنانە".
لەبارەی چارەنووسی خۆی و ئەگەری مەشقدانی هەڵبژاردەی بەرازیل، ئەو دەڵێ، "هەستدەکەم لە ریال مەدرید کێشەم نییە، پەیوەندییەکی نایابم لەگەڵ فلۆرێنتینۆ پێرێز، سەرۆکی ریال مەدرید هەیە و ژیان لە مەدرید جادووییە".
راهێنەری پێشووی میلان، رەخنەی لە هەڵسوکەوتی بەرپرسانی ئەو یانەیە لەگەڵ پاولۆ ماڵدینی، بەڕێوەبەری وەرزشیی دوورخراوەی ئەو یانەیە کردووە و دەڵێ، خاوەنە ئەمریکییەکانی یانەکە کولتووری میلان شارەزا نین، ئەوان کەمئەزموونن لەبارەی کولتوریی مێژوویی ئەو یانەیەوە و لەوە ناگەن کە ماڵدینی مانای چی دەدات بۆ یانەکە.
کارلۆ پێیوایە گەورەترین کێشەی ئێستای دونیای تۆپی پێ، رەگەزپەرستییە و داوای وەڵامدانەوەی تووند و خێرای کردووە لە ئیسپانیا بەرامبەر ئەو کارە، بەتایبەت کە بەرامبەر ڤینیسیۆس جۆنیۆری یاریزانی ریال مەدرید ئەنجامدراوە، کارلۆ دەڵێ من لە ئینگلتەرا ئەوەم نەبینیووە بەرامبەر یاریزانان بکرێت، کە لە ئیسپانیا دەیبینم.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ