رووداو دیجیتاڵ
یانەی بارسێلۆنا ئاستێکی سەرنجڕاکێشی لە یاری پێش کۆتایی جامی سوپەری ئیسپانیادا پێشکەش کرد و بە ئەنجامی 5-0 لە یانەی ئاتلێتیک بیلباوی بردەوە، بەمەش گەیشتنی بە یاری کۆتایی مسۆگەر کرد و پەیامێکی هۆشداری تووندی بۆ رکابەرەکانی نارد.
لە یاریگەی شاری وەرزشیی شا عەبدوڵا لە جەددە، بارسێلۆنا هەر لە خولەکەکانی سەرەتاوە جڵەوی یارییەکەی گرتە دەست و رێگەی نەدا یاریزانانی ئاتلێتیک بیلباو هێرش ببەن، ریتمی خێرای یارییەکەیان، گوشارە تووندەکانیان و کارامەییان لە گۆڵکردندا، وایکرد یاریی پێش کۆتایی پێش تەواوبوونی نیوەی یەکەم ببێتە یارییەکی تاکلایەنە.
بارسا لە خولەکی 22دا دەرگای گۆڵ تۆمارکردنی کردەوە، فێران تۆرێس بە شێوەیەکی هێمنانە لەنێو ناوچەی سزادا گۆڵەکەی تۆمارکرد، تەنیا هەشت خولەک دواتر، فێرمین لۆپێز جیاوازییەکەی کردە 22 گۆڵ.
گۆڵەکان هەر بەردەوام بوون، لە خولەکی 34دا، روونی بەرداخچی، باڵە لاوەکە گۆڵی سێیەمی زیاد کرد، پێش ئەوەی ئاتلێتیک بتوانێت خۆی رێکبخاتەوە، رافینیا ساتێکی بلیمەتانەی خولقاند و لە خولەکی 38دا بە لێدانێکی نایاب، ئەنجامەکەی کردە 4-0 و بارسێلۆنای گەیاندە قۆناخی داهاتوو، پێش پشووی نێوان هەردوو گێم.
بارسێلۆنا دوای پشووی نێوان هەردوو گێم هیچ نیشانەیەکی خاوکردنەوەی ئاستەکەی پێوە دیار نەبوو، رافینیا لە سەرەتای نیوەی دووەمدا جارێکی دیکە گۆڵی تۆمارکرد، لە مەودایەکی نزیکەوە تۆپەکەی خستە نێو گۆڵ و بەمەش دووەم گۆڵی خۆی تۆمارکرد و کۆتایی بە نمایشە تاکەکەسییە باڵاکەی هێنا، یاریزانە بەرازیلییەکە بەدرێژایی یارییەکە مەترسییەکی بەردەوام بوو و وەک دیارترین یاریزانی ئەو شەوە دەرکەوت.
یانەی ئاتلێتیک بیلباو زەحمەتییەکی زۆری هەبوو لە رووبەڕووبوونەوەی جووڵە و چڕیی یارییەکەی بارسێلۆنادا، هەلی زۆر کەمی روونیان بۆ دروست بوو و بۆ ماوەیەکی درێژ لە نیوەی یاریگای خۆیاندا گیریان خواردبوو.
کەتەلۆنییەکان کۆنترۆڵی تۆپیان کردبوو و ریتمی یارییەکەیان ئاڕاستە دەکرد، دەیانتوانی گۆڵی زیاتریش تۆمار بکەن.
بەم سەرکەوتنە گەورەیە، بارسێلۆنا گەیشتە یاری کۆتایی جامی سوپەری ئیسپانیا، تێیدا رووبەڕووی براوەی دێربیی مەدرید لە نێوان ریال مەدرید و ئاتلێتیکۆ مەدرید دەبێتەوە، ئەگەری بینینی کلاسیکۆیەکی دیکە لە یاریی کۆتایی جامی سوپەر هەیە، لە ئێستاوە جۆش و خرۆشی لای هاندەران و شرۆڤەکاران دروست کردووە، لە کاتێکدا ئاتلێتیکۆ مەدرید چاوی لەوەیە ئەو سیناریۆیە تێکبدات.
