رووداو دیجیتاڵ
یانەی هیلالی سعودی لە دوایین ساتەکانی ماوەی گواستنەوەی زستانەی یاریزاناندا گواستنەوەی کەریم بنزیما، ئەستێرەی فەرەنسی و یانەی ئیتیحادی راگەیاند.
یانە سعودییەکە دوای مشتومڕێکی زۆر لە چوون و نەچوونی ئەو یاریزانە بۆ یانەکە بەهۆی ناڕەزایەتییەکانی کریستیانۆ رۆناڵدۆ، لە شێوازی مامەڵەکردنی سندووقی وەبەرهێنانی سعودی لە پرسی گواستنەوەی یاریزاناندا بۆ یانەکان، کۆتایی بە هەموو چاوەڕوانییەکان هێنا و بەفەرمی گواستنەوەی یاریزانەکەی بۆ یانەکە راگەیاند.
هیلال وێنەیەکی کەریم بنزیمای داناوە و لەسەری نووسیووە، من لێرەم بۆ ئەوەی ببمە بەشێک لەم مێژووە.
گواستنەوەی کەریم بنزیما لەلایەن یانەی هیلالەوە لە دوایین خولەکەکانی بازاڕی گواستنەوەی زستانەی خولی سعودی بوو و دوای ئەو گرێبەستە دەرگای گواستنەوەکان داخرا.
کەریم بنزیما لە پەیامێکدا ماڵئاوایی لە یانەی ئیتیحاد کرد و نووسیوویەتی "ئیتیحاد، ئەم بابەتە کۆتایی دێت، بەڵام رێز و سوپاسگوزاری بۆ هەمیشە دەمێنێتەوە، سوپاس بۆ یانەکە، ستاف و هاوڕێکانم لە تیپەکە، بە تایبەت بۆ هاندەران بۆ ئەو پێشوازی و خۆشەویستییەی کە هەموو رۆژێک پێیان دەبەخشیم."
بنزیما دەڵێت "ئەم گەشتە زۆر شتی پێبەخشیم، چ لەرووی کەسییەوە چ لە رووی پیشەییەوە، بە سەربەرزییەوە دەڕۆم و شانازی دەکەم کە ئەم رەنگانەم پۆشیووە و شانازی بە هەموو ئەو شتانەوە دەکەم کە بەیەکەوە هاوبەشیمان تێیدا کردووە."
گواستنەوەی بنزیما لەلایەن هیلالەوە لەکاتێکدایە، کریستیانۆ رۆناڵدۆ لە یاریی نەسڕ و ریازدا یاریی نەکرد، وەکو پێشاندانی ناڕەزایەتیی بەرامبەر مامەڵەی سندووقی وەبەرهێنانی سعودی بۆ گواستنەوەی یاریزانان و پێیوایە جیاوازی لەنێوان یانەکاندا دەکرێت.
رۆژنامەی ریکۆردی پۆرتوگالی دەڵێت "ئەگەری هەیە رۆناڵدۆ بەشداری لە یارییەکانی داهاتووی نەسڕدا نەکات و بیر لەوە دەکاتەوە لە هاوینی 2026 لە یانەکە بڕوات."
