رووداو دیجیتاڵ
10 ساڵ لەمەوبەر، فابیان هۆرزلەر، کارەکەی لە فرۆشتنی تابلۆی هونەریدا لەدەستدا، چونکە لە کاتی ئێشدا، تەماشای یارییەکانی تۆپی پێی دەکرد. مانگی دووی رابردوو، هاندەرانی یانەی برایتۆن بە هاوار داوای دەرکردنیان دەکرد، بەڵام ئەم راهێنەرە ئەڵمانییە تەمەن 33 ساڵانە، توانی یانەکەی بگەیەنێتە پلەی دووەمی پرێمەرلیگ، دوای ئەوەی بەسەر ئارسیناڵ و مانچێستەر سیتیدا سەرکەوت و کریستاڵ پاڵاسی رکابەری بە پێنج گۆڵی بێبەرامبەر تێکشکاند.
لە چرکەکانی کۆتایی یاریی نێوان برایتۆن و کریستاڵ پاڵاس لەسەرەتای مانگی دووی 2026، هۆرزلەر لەسەر هێڵی یاریگای ئامێکس راوەستابوو، لە کاتێکدا هاندەران بە دەنگی بەرز هاواریان دەکرد و داوای دەرکردنیان دەکرد. تووڕەیی هاندەران کاتێک دەستیپێکرد کە راهێنەرە ئەڵمانییەکە سێ گۆڕانکاریی لە یەک کاتدا ئەنجامدا، لەنێویاندا دەرهێنانی کارلۆس بالیبای یاریزانی کامیرۆنی بوو، جەماوەر هاواریان دەکرد، "تۆ نازانیت چی دەکەیت" و دەیانگوت سبەی بەیانی دەردەکرێیت.
یارییەکە بە دۆڕانی برایتۆن بە گۆڵێکی بێبەرامبەر کۆتاییهات و تیپەکە دابەزییە پلەی 14ی ریزبەندی خولەکە، پاشئەوەی لە دوایین 12 یاریی تیپەکەدا، تەنیا یەک بردنەوەی تۆمارکردبوو. لە کۆنگرەی رۆژنامەڤانیدا کاتێک لەبارەی ئەو هاوارانەوە پرسیاری لێکرا، هۆرزلەر گوتی "پێموایە هەمووان دەتوانن هەست بەوە بکەن کاتێک 25 هەزار کەس هاوارت لە دژ دەکەن چ هەستێکت دەبێت، دۆخێکی زۆر سەختە". پاشان گوتی "دوو بژاردەت لەبەردەمدایە: یان خۆت بەدەستەوە بدەیت، یان بە تووندی بەردەوام بیت لە کارکردن، ئەمەش ئەو رێگایەیە، کە من هەمیشە لە ژیانمدا گرتوومەتەبەر".
دوای هەشت مانگ لەو رووداوە، کریستاڵ پاڵاس گەڕایەوە هەمان یاریگا، بەڵام لە 10 خولەکی یەکەمدا سێ گۆڵی لێکرا و یارییەکە بەبردنەوەی گەورەی برایتۆن بە ئەنجامی 5-0 کۆتاییهات. پاش دوو هەفتە، هۆرزلەر یەکەم بردنەوەی لە مێژووی یانەی برایتۆندا لەسەر یاریگای مانچێستەر سیتی بەدەستهێنا، پاشان لە 8ـی مانگی 11 بە دوو گۆڵی بێبەرامبەر لە برێنتفۆردی بردەوە و بە 22 خاڵ لە 10 یارییدا سەرکەوت بۆ پلەی دووەمی پرێمەرلیگ، بە جیاوازیی پێنج خاڵ لەدوای ئارسیناڵی پێشەنگ. برایتۆن بە تۆمارکردنی 26 گۆڵ بووە بەهێزترین هێڵی هێرشبەری خولەکە لە باشترین دەستپێکی مێژووی خۆیدا.
لە بایرن میونشنەوە بۆ فرۆشتنی تابلۆ
هۆرزلەر ساڵی 1993 لە لە شاری هیوستنی ئەمریکا لە باوکێکی سویسری و دایکێکی ئەڵمانی لە دایکبووە. باوانی ئەو لە بواری پزیشکیی دداندا کاریان دەکرد، لە تەمەنی دوو ساڵیدا لەگەڵ خێزانەکەی گەڕایەوە ئەورووپا. لە سەردەمی منداڵیدا بۆ ئەوەی نەچێتە مەشقی تۆپی پێ، لەژێر مێزی ماڵەوە خۆی دەشاردەوە و باوکی بە زۆر دەریدەهێنا. لە تەمەنی 9 بۆ 10 ساڵیدا پەیوەندیی بە تۆپی پێوە گۆڕدرا و لە گەشتەکانیدا، بۆ ئەمریکا تۆپی تێنسی پێبوو تا لە فڕۆکەخانەکاندا بە پێیەکانی لە هەوادا رایبگرێت.
ئەو چووە ئەکادیمیای بایرن میونشن و لە هەڵبژاردەی لاوانی ئەڵمانیا یاریی کرد، دواتر چووە هۆفێنهایم و میونشن 1860، بەڵام نەیتوانی بگاتە پێکهاتەی یەکەم. ساڵی 2024 هۆکاری سەرنەکەوتنی وەک یاریزان روونکردەوە و گوتی، نەیدەتوانی لەنێو ناوچەی سزادا بەرگرییەکی باش بکات و گۆڵی زۆریش تۆمار ناکات، بۆیە لە تەمەنی 23 ساڵیدا وازی لە یارییکردن هێنا و لە یانەی پیپینسرێدی خولی پلە پێنجی ئەڵمانیا بووە یاریزان و راهێنەر.
لەبەرئەوەی داهاتی ئەو خولە بەشی نەدەکرد، لە ساڵی 2016 لە میونشن لای بازرگانێکی تابلۆی هونەری دەستی بە کارکردن کرد. ئەرکی ئەو ئەوە بوو کڕیاران قایل بکات، بە کڕینی تابلۆی شێوەکارە ناودارەکانی وەک رۆی لیختنشتاین و دامیان هێرست. هۆرزلەر لە مانگێکدا بە فرۆشتنی تەنیا یەک تابلۆ بەشی پێویستی بەدەستدەهێنا و تەواوی کاتەکانی دیکەی، لە شوێنی کارەکەی بۆ بینین و شیکردنەوەی یارییەکانی تۆپی پێ تەرخان دەکرد، کاتێک خاوەن کارەکە درکی بەمە کرد، لە کارەکەی دەریپەڕاند.
هۆرزلەر هەمیشە ئەو ئەزموونەی لە پەیوەندی لەگەڵ یاریزانەکانیدا بەکارهێناوە و دەڵێت قایلکردنی کڕیار بە کڕینی تابلۆ، تەنیا بە باسکردنی جوانییەکەی نابێت، بەڵکو دەبێت بزانیت ئەو کەسە بەدوای چیدا دەگەڕێت، لە راهێنەرایەتیشدا پێویستە لە ژینگە و کەسایەتیی یاریزان تێبگەیت، بەر لەوەی داوای جێبەجێکردنی پلانەکانی لێبکەیت، وەک چۆن باسی جیاوازیی ژینگەی یانکوبا میندێی گامبی و جەیمس میلنەری ئینگلیزی دەکات.
هۆرزلەر وەک یاریزان بە تووڕەیی ناسرابوو؛ لە 91 یاریدا لەگەڵ پیپینسرێد 46 کارتی زەرد و 6 کارتی سووری وەرگرتبوو، ئەم تووڕەییەش لەگەڵیدا مایەوە تاوەکو لە مانگی 9ـی 2024 لە یاریی بەرامبەر نۆتینگهام فۆرێست، کارتی سووری وەرگرت. کاتێک تەماشای گرتە ڤیدیۆییەکانی هەڵچوونی خۆی دەکاتەوە بە سەرسوڕمانەوە بە خۆی دەڵێت "ئایا تۆ شێتیت؟ ئەوە چی دەکەیت لەوێ؟".
دە بردنەوەی لەسەریەک دەرگای پرێمەرلیگی بۆ کردەوە
لە مانگی 12ـی 2022، یانەی سانت پاوڵی لە پلەی پانزەیەمی خولی پلە دووی ئەڵمانیا بوو، بە جیاوازیی یەک خاڵ لە ناوچەی دابەزین. یانەکە تیمۆ شولتسی راهێنەری دوورخستەوە و ئەرکەکەی، بەخشییە هۆرزلەری یاریدەدەری کە تەمەنی تەنیا 29 ساڵ بوو. هۆرزلەر بە بردنەوە لە 10 یاریی یەکەمیدا، کە تێیاندا تەنیا 3 گۆڵی لێکرا، مێژووی لە خولەکەدا تۆمارکرد، وەرزەکەی لە پلەی پێنجەم تەواو کرد و وەرزی دواتریش بە 20 یاریی بێ دۆڕان دەستیپێکرد و نازناوی خولەکەی بردەوە و توانی دوای 13 ساڵ، سانت پاوڵی بگەیەنێتەوە بۆندێسلیگا. لە مانگی 5ـی 2024 هاندەران چوونە نێو یاریگای میلێرنتۆر و راهێنەرە گەنجەکەیان لەسەر شانیان هەڵگرت.
پێشتر هۆرزلەر سەردانی برایتۆنی کردبوو، بۆ فێربوون لە شێوازی کارکردنی رۆبێرتۆ دی زێربییەوە، هەروەها سەردانی تۆتێنهامیشی کردبوو لە سەردەمی پۆستێکۆگلۆ، کە راهێنەرە ئوسترالییەکە رایگەیاندبوو، بەهۆی زۆریی پرسیارەکانی، ناچاربووە بیداتە دەست یەکێک لە یاریدەدەرەکانی. لە حوزەیرانی 2024 برایتۆن هۆرزلەری بە گرێبەستێکی هەمیشەیی کردە راهێنەری یانەکە، ئەوکات ئەو، تەمەنی تەنیا 31 ساڵ بوو، بەوەش بووە گەنجترین راهێنەری مێژووی پرێمەرلیگ و تەنانەت لە یاریزانانی وەک میلنەر و وێلبێک گەنجتر بوو. لە وەرزی یەکەمدا پلەی هەشتەمی بەدەستهێنا و لەگەڵ سەرکەوتنی بۆ کۆنفرانسلیک، گرێبەستەکەی تاوەکو ساڵی 2029 درێژکرایەوە.
ناکۆکی لەگەڵ گواردیۆلا و رەخنەی تووند لە ئارتێتا
لە کانوونی دووەمی 2026 لە یاریی نێوان برایتۆن و مانچێستەر سیتی، کە بە ئەنجامی 1-1 کۆتاییهات، بە تووڕەیی لەگەڵ پێپ گواردیۆلا کەوتە دەمەقاڵە و گواردیۆلا، ئامادە نەبوو ناوەرۆکی قسەکانیان ئاشکرا بکات. هۆرزلەر بووە تاکە راهێنەر، لە چوار یاریی یەکەمیدا بەرامبەر گواردیۆلا تووشی شکست نەبووبێت، ئەو دوو یەکسانبوون و دوو بردنەوەی لە بەرامبەر پێپدا بەدەستهێنا.
لە 4ـی مانگی 3ـدا، دوای دۆڕانی بە ئارسیناڵ بە گۆڵێکی بێبەرامبەر، رەخنەی تووندی لە شێوازی کاتکوشتنی یاریزانانی ئارسیناڵ و بەردەوام کەوتنی داڤید رایای گۆڵپارێز گرت و گوتی "تەنیا یەک تیپ هەوڵی یارییکردنی دەدا، وا هەستدەکەم ئەوان یاسای تایبەت بە خۆیان دادەنێن"، ئارتێتاش بە گاڵتەجاڕییەوە وەڵامی دایەوە: "ئەمە چ سوپرایزێکە!".
پاش 9 رۆژ نامەیەکی بۆ ئارتێتا نارد و رێزی خۆی بۆ دەربڕی، بەڵام پێداگر بوو لەسەر رەخنەکانی. دواتر لە مانگی 9ـدا، برایتۆن لەسەر یاریگای ئامێکس بە ئەنجامی 3-0 شکستی بە ئارسیناڵی پاڵەوان هێنا، وێڕای ئەوەی تەنیا 40٪ تۆپی پێبوو، ئەمەش وایکرد خەڵاتی باشترین راهێنەری مانگی نۆ لە پرێمەرلیگ بەدەستبهێنێت، بەر لەوەی لە 31ـی مانگی 10 لەسەر یاریگای ئیتیحاد بردنەوەیەکی مێژوویی بەرامبەر مانچێستەر سیتی تۆماربکات.
پێنج گۆڵ و ئەو پاسەی هۆرزلەری بێزار کرد
لە 18ـی مانگی 10، برایتۆن بە ئەنجامی 5-0 تۆڵەی لە کریستاڵ پاڵاس کردەوە و گەورەترین بردنەوەی مێژووی خۆی لە ساڵی 1956ـەوە بەرامبەر ئەو یانەیە دووبارە کردەوە، کە تێیدا دیێگۆ گۆمێز گۆڵێکی لە دووریی 47 مەترەوە تۆمارکرد. هۆرزلەر لەبری دڵخۆشی بەو گۆڵە ناوازەیە، لە کۆنگرەی رۆژنامەڤانیدا، سەرنجی خستە سەر ئەو پاسە کورت و ئاسانانەی کە یاریزانەکانی بە هەڵە دابوویان و گوتی، دەبێت بزانین چەندین لایەن هەن پێویستە باشتر بکرێن. لە کاتێکدا باسکال گرۆسی ئەستێرەی دێرین، داوای هێوربوونەوە دەکات، هۆرزلەر دووپاتیدەکاتەوە کە هاندەران مافی خۆیانە خەون ببینن و ئەرکی ئەوانە شایستەی ئەو پشتگیرییە بن.
ئەمە چیرۆکی ئەو گەنجەیە کە 10 ساڵ لەمەوبەر بەهۆی سەیرکردنی یارییەکان لە کارەکەی وەک تابلۆفرۆش دەرکرا، بەڵام لە ماوەیەکی کەمدا لە خولی پلە پێنجی ئەڵمانیاوە گەیشتە ئەوەی، برایتۆن بکاتە بەهێزترین هێڵی هێرشبەری بە تۆمارکردنی 26 گۆڵ و جێگیربوونی لە پلەی دووەمی بەهێزترین خولی جیهاندا.
