رووداو دیجیتاڵ
هاري كين، هێرشبەری یانەی بایرن میونشنی ئەڵمانی، وەک پاڵێوراوی سەرەکی بۆ بردنەوەی خەڵاتی باڵۆندۆر بۆ ساڵی 2026 دەردەکەوێت، پێش ئەو ئاهەنگەکە لە شاری لەندەنی پایتەختی بەریتانیا بەڕێوەبچێت.
کین وەک دیارترین پاڵێوراو بۆ بردنەوەی خەڵاتەکە دەردەکەوێت، دوای ئەوەی وەرزێکی نایابی لەگەڵ بایرن مۆنشن پێشکەش کرد و تێیدا 73 گۆڵی لە سەرجەم پاڵەوانێتییەکاندا لەگەڵ یانە و هەڵبژاردەکەیدا لە وەرزی 2025 / 2026 تۆمار کرد. هەروەها نازناوی خولی ئەڵمانیای بەدەستهێنا و بوو بە گۆڵکاری خولەکە، جامی ئەڵمانیای بردەوە و سەری لە لیستەی گۆڵکارانیشی گرت، لە کاتێکدا بایرن گەیشتە قۆناخی پێش کۆتایی خولی یانە پاڵەوانەکانی ئەوروپا.
هەلەکانی کین بەهۆی دەستپێکە هەنگاوپڕ و بەهێزەکەیەوە لە وەرزی 2026 / 2027 پتەوتر بوون، سەرەڕای دەرچوونی یانەکەی لە قۆناخی پێشکۆتایی خولی یانە پاڵەوانەکان و بەدەستهێنانی پلەی سێیەم لە جامی جیهانی لەگەڵ هەڵبژاردەی ئینگلتەرا. کین کە تەمەنی 33 ساڵە، هیوادارە ببێتە یەکەم یاریزان لە بایرن میۆنشن کە لە دوای کارل هاینز رومینیگە لە ساڵی 1981ـەوە تۆپی زێڕین بەدەستبهێنێت، هەروەها دەکرێت ببێتە یەکەم ئینگلیزی کە لە دوای مایکل ئۆوین لە ساڵی 2001ـەوە خەڵاتەکە بباتەوە.
بەڵام کێبڕکێکە ئاسان نابێت، بەهۆی ئەو وەرزە بەهێزەی لامین یامال لەگەڵ بارسێلۆنا و هەڵبژاردەی ئیسپانیا پێشکەشی کرد. یاریزانە گەنجەکە 25 گۆڵی تۆمار کرد و 20 گۆڵی دروستکرد لەو ماوەیەی کە ئاماری پاڵێوراوەکان دەیگرێتەوە، و بەشداری کرد لە بردنەوەی نازناوی خولی ئیسپانی لەگەڵ بارسێلۆنا، هەروەها لە لوتکەی دروستکەرانی گۆڵدا بوو لە خولەکەدا، و توخمێکی گرنگ بوو لە سەرکەوتنی ئیسپانیا لە جامی جیهانیدا.
سەبارەت بە کیلیان ئێمبابێ، 58 گۆڵی تۆمار کرد و 13 گۆڵی دروستکرد لەگەڵ ریال مەدرید و هەڵبژاردەی فەرەنسا، و بوو بە گۆڵکاری خولی ئیسپانیا و خولی یانە پاڵەوانەکانی ئەوروپا، هەروەها سەری لە لیستەی گۆڵکارانی جامی جیهانیدا گرت، دوای ئەوەی 10 گۆڵی لە پاڵەوانێتییەکەدا تۆمار کرد.
لیۆنێل مێسی ئەرجەنتیش لە نێو پاڵێوراوەکاندا دیارە، دوای ئەوەی 45 گۆڵی تۆمار کرد و 30 گۆڵی دروستکرد، و اینتەر مێامی بەڕێوەبرد بۆ بەدەستهێنانی خولی ئەمریکی، لە پاڵ گەیشتنی هەڵبژاردەی ئەرژەنتین بە یاری کۆتایی جامی جیهانی.
لیستی پاڵێوراوەکان چەندین ئەستێرەی دیاری تۆپی پێی تێدایە، لەوانە: مایکل ئۆلیسێ، ئێرلینگ هالاند، جود بێلینگهام، ڤینیسیۆس جونیۆر، رۆدری، خڤیچا کڤاراتسخیلیا، لەگەڵ عوسمان دێمبێلێ کە خەڵاتەکەی لە ساڵی 2025ـدا بردەوە، و رۆدری کە لە ساڵی 2024ـدا خەڵات کرابوو.
جگە لە باڵۆندۆری پیاوان، ئاهەنگەکە چەندین خەڵاتی دیکە بەخۆیەوە دەبینێت، لەوانە پێشکەشکردنی تۆپی زێڕینی خانمان دەبێت، لەگەڵ دوو خەڵاتی کۆپا بۆ باشترین یاریزانی کوڕ و کچی خوار 21 ساڵ، دوو خەڵاتی یەشین بۆ باشترین گۆڵپارێزی کوڕ و کچ، دوو خەڵاتی جێرد مۆلەر بۆ باشترین گۆڵکاری کوڕ و کچ، دوو خەڵاتی یۆهان کرۆیف بۆ باشترین راهێنەری کوڕ و کچ، دوو خەڵاتی باشترین یانە بۆ پیاوان و خانمان، لەگەڵ خەڵاتی سوکرات بۆ کارە مرۆیی و کۆمەڵایەتییەکان، بەمەش کۆی گشتی خەڵاتەکان دەگاتە 13 خەڵات.
